Elimizde stýdentter úshin jataqhanada 63 myńnan astam oryndy qamtamasyz etý kerek. Bul týraly Ortalyq kommýnikatsiialar qyzmetinde ótken baspasóz máslihatynda QR Bilim jáne ǵylym ministrligi «Qarjy ortalyǵy» AQ basqarma tóraǵasy Asqar Ibraimov aitty, dep habarlaidy QazAqparat.
«Stýdenttik jataqhanalardy salý jáne jańǵyrtýǵa toqtalsaq, 2018 jyly elimizdiń Tuńǵysh Prezidenti Bes áleýmettik bastamasyn jariialaǵan bolatyn, solardyń biri stýdent jastardyń ómir súrý jaǵdailaryn jaqsartýǵa baǵyttalǵan. Osy mindetke qol jetkizý úshin jekemenshik sektordyń aýqymdy qatysýyn kózdeitin memlekettik tapsyrysty ornalastyrý tetigi ázirlendi. Biz investorlardy, jeke kásipkerlerdi memlekettiń qarjylyq qoldaýymen stýdenttik jataqhanalar qurylysyna qarjy salýǵa shaqyramyz. Bul protseske kezekti áleýmettik nysandy turǵyzý retinde emes, tabysty, turaqty jáne keleshegi mol biznes-joba retinde áldeqaida aýqymdy qaraýdy usynamyn. Ári osylai aitýǵa barlyq alǵysharttar bar», - dedi A. Ibraimov.
Onyń aitýynsha, bul turǵyda joǵary suranys baiqalyp otyr. Óitkeni, qazirgi kezde elimizde 63 myńǵa jýyq stýdent jataqhanadaǵy orynǵa muqtaj. Bul megapolisterden bastap oblystyq mańyzy bar qalalarǵa deiingi elimizdiń barlyq óńirlerine tán qajettilik. Aldaǵy ýaqytta stýdentter kontingenti ósetin bolady. Álbette, bul jaǵdai stýdenttik jataqhanalarǵa degen suranystyń artýyna áser etedi.
