«Ulttyq volonterler jelisi» ZTB tóraǵasy Vera Kim qazir volonterler kóbine jalǵyzbasty adamdarǵa kómektesip jatqanyn aitady, dep habarlaidy QazAqparat.
«Bizdiń Ulttyq volonterlik jeli ashqan senim telefony týraly aita ketsem deimin. Tótenshe jaǵdai kezinde bizge kómek surap, 2 myńnan astam adam qońyraý shaldy. Árine, zeinet jasyndaǵy adamdar da habarlasyp jatty. Biz 851 otbasyna kómektestik. Tizim jasap, volonterler sol boiynsha kómektesti. Bir ret kómek alyp, endi basqalarǵa kómektesińizder degen adamdar da bolǵanyn atap ótý kerek», - dedi Vera Kim OKQ onlain baspasóz máslihatynda.
Vera Kim qazirgi ýaqytta jalǵyzbasty adamdarǵa kóbirek kómek berilip jatqanyn aitady.
«Qazir jalǵyz qalǵan adamdar ómirdiń qiyndyǵymen betpe-bet kelip turǵanyn aita ketý kerek. Ondai sanattaǵy adamdardyń birazy - egde jastaǵylar. Olarǵa bir ret aparylǵan azyq-túlik 1-2 aptaǵa jetýi múmkin. Keide bizge ekinshi ret habarlasatyn zeinetkerler de bolady. Ondaida qarajatymyz bolsa, mindetti túrde baryp, azyq-túlik aparyp beremiz», - deidi ol.
