Foto: Kirill Kýhmar/TASS
Qazir halyqtyń 84 paiyzynda, iaǵni 8,4 millionnan astam adamnyń qaryzy bar. Bul týraly Májilistegi «Halyqtyń shamadan tys kredit alýyn azaitý jáne qarjylyq saýattylyqty arttyrý» taqyrybyndaǵy Parlament tyńdaýynda palata tóraǵasy Erlan Qoshanov aitty, dep habarlaidy Kazinform agenttigi.
«Jasyratyny joq, qazir bankterden shekteýsiz kredit alyp, qaryzǵa belshesinen batyp otyrǵan azamattarymyz kóp. «Halyq nesie qamytyn kiip otyr» dese de bolady. Adamdardyń nesiege táýeldiligi men qarjylyq saýatynyń tómendigi úlken áleýmettik problemaǵa ainaldy.
Búgingi jiynda biz osy túitkildi jan-jaqty talqylaimyz. Osy maqsatta jaýapty organdardy – Úkimet múshelerin, agenttikter men quzyrly mekemeler basshylaryn arnaiy shaqyrdyq. Ózderińiz bilesizder, Memleket basshysy Joldaýynda nesie máselesine keńinen toqtalyp, ony sheshý joldaryn qarastyrý týraly tapsyrma bergen bolatyn. Depýtattar da bul túitkilmen jaqsy tanys. Óitkeni, biz aimaqtarǵa jii shyǵamyz. Meniń ózim de talai óńirde bolyp, halyqpen júzdestim. Kóbiniń aitatyny bir nárse, ol – nesiege táýeldilik. Bul, ókinishke qarai, jalpyhalyqtyq sipat alǵan qubylysqa ainalyp tur», – dedi Qoshanov.
Palata spikeriniń sózine qaraǵanda, qazir halyqtyń 84 paiyzynda, iaǵni 8,4 millionnan astam adamnyń qaryzy bar eken. Keiingi bir jarym jylda bul kórsetkish 27 paiyzǵa artqan.
«90 kúnnen keshiktirilgen qaryz kólemi – shamamen 1,4 trln teńge. Iaǵni, 1,7 million adam qaryzyn ýaqytyly tólei almai otyr degen sóz. Osynyń bári nesie problemasynyń qanshalyqty asqynyp ketkenin kórsetedi», – dedi Májilis tóraǵasy.
