Memlekettik qyzmet isteri agenttigi Almaty oblysyndaǵy oiynhanada 507 million teńge jaratqan 305 sheneýnikti tekseredi, - dep habarlaidy "Ult aqparat" QR MQIA baspasóz qyzmetine silteme jasap.
"Memleket basshysynyń tapsyrmasyna sáikes QR Memlekettik qyzmet isteri agenttigimen jekelegen memlekettik qyzmetshilerdiń qumar oiyndarǵa qatysý máseleleri boiynsha tiisti tekserýler júrgizilip jatyr.
Memlekettik qyzmetshiler tarapynan zańbuzýshylyq anyqtalǵan jaǵdailarda naqty sharalar qoldanylady", - delingen habarlamada.
Memlekettik qyzmetshilerdiń moraldyq-ádeptilik beinesine qoiylatyn talaptar Qazaqstan Respýblikasy memlekettik qyzmetshileriniń ádep kodeksinde aiqyndalǵan.
"Kodekske sáikes memlekettik qyzmetshiler óz qyzmetinde memlekettik biliktiń bedeline jáne memlekettik qyzmetke kir keltiretin áreketterge barmai, kez kelgen jaǵdaida ádep normalaryn saqtap, birinshi kezekte eldiń, memlekettiń múddesine qyzmet etýi tiis.
Agenttikpen jáne ádep jónindegi ýákildermen memlekettik qyzmetshilermen ádep normalaryn saqtaý boiynsha profilaktikalyq jumystar turaqty túrde iske asyrylady", - delingen habarlamada.
Eske salaiyq, buǵan deiin Almaty oblysynyń prokýratýrasy tekserý júrgizip, 305 qazaqstandyq sheneýnik oiynhanada 507 million teńge jumsaǵanyn anyqtady. Tekserý qorytyndysy quzyrly organdarǵa tapsyrylǵan bolatyn.
