Qajymuqan Muńaitpasulynyń memorialdyq keshenin salýǵa respýblikalyq biýdjetten qarjy bólinbei otyr. Bul týraly QR Premer-Ministri Asqar Maminge depýtattyq saýal joldaǵan senator Álimjan Qurtaev aitty, dep habarlaidy QazAqparat.
«2019 jylǵy 8 qarashadaǵy Qajymuqan Muńaitpasulynyń 150 jyldyq mereitoiyn daiyndaý men ótkizýge qatysty depýtattyq saýalymyzǵa, qazaqtyń áigili palýany Qajymuqan Muńaitpasulynyń 150 jyldyq mereitoiy Qazaqstan Respýblikasy Mádeniet jáne sport ministriniń 2018 jylǵy 25 tamyzdaǵy № 228 buiryǵymen bekitilgen 2019-2021 jyldarǵa arnalǵan mereitoilar men ataýly kúnderdiń tizbesine engizilgenin habarlap, qazaqtyń belgili palýany Qajymuqan Muńaitpasulynyń 150 jyldyq mereitoiyn merekeleý Úkimettiń erekshe baqylaýynda jáne tiisti deńgeide atalyp ótetinin jetkizdińiz. Túrkistan oblysy, Ordabasy aýdanynda Qajymuqan Muńaitpasulynyń 150 jyldyǵyna orai qazaq dalasy batyrynyń atyna memorialdyq keshen salynatyn bolyp josparlanǵan. Zamanaýi úlgide boi kóteretin nysannyń qurylys jumystary ústimizdegi jyldyń qarasha aiynda bastalyp, 2021 jyldyń qazan aiynda paidalanýǵa beriledi dep kútilgen bolatyn. Alaidy, qazirgi jaǵdaida bulai deý múmkin emes sekildi, sebebi qurylys jumystaryn bastaýǵa tiisti qarajat qaralmaǵan», - dedi senator.
Onyń atap ótýinshe, QR Premer-Ministriniń orynbasary Eraly Toǵjanov Túrkistan oblysyna jumys saparynda Qarjy ministrligine Qajymuqan Muńaitpasulynyń memorialdyq keshenin salý úshin respýblikalyq biýdjetten qarjy bólýdi júktegen. Iaǵni, 2020 jyly bastalyp 2021 jyly aiaqtalýy kózdeletin qarajat bólý jóninde usynys engizýdi tapsyrǵan.
«Bul tapsyrma aiaqsyz qaldy deýge bolady. «Batys Qytai – Batys Eýropa» halyqaralyq kólik dálizi boiynda salynatyn memorialdyq keshenniń jalpy aýmaǵy 5 gektardy quraidy. Onda kitaphana, kórme zaly, qonaq úi, ashana, konferents zaly, sport zaly, sportshylardyń kiim aýystyrýǵa, jýynýǵa arnalǵan jáne basqa da qajetti bólmelermen qamtylmaq. Sondai-aq, sporttyń birneshe túrimen shuǵyldanýǵa laiyqty keshen túrli deńgeidegi jarystardy ótkizýge de yńǵaily bolmaq», - degen Álimjan Qurtaev Premer-Ministrden memorialdyq keshendi salýǵa tiisti qarajatty 2021 jyldyń biýdjetinde qaraýdy surady.
