«Qazaviaqutqarý» AQ Mi-8AMT tikushaǵy Aqmola oblysy aýmaǵynda shuǵyl qonýǵa májbúr boldy, dep habarlaidy QazAqparat «Qazaviaqutqarý» AQ baspasóz qyzmetine silteme jasap.
Vedomstvonyń málimetinshe, tikushaq jedel shaqyrý boiynsha Nur-Sultannan shyǵyp, Ekibastuz qalasyna bara jatqan.
«2021 jylǵy 26 qarashada QR TJM «Qazaviaqutqarý» AQ Mi-8AMT tikushaǵy Ulttyq shuǵyl meditsinany úilestirý ortalyǵynyń jedel ótinimi boiynsha «Nur-Sultan – Ekibastuz» baǵytynda shyqqan. Alaida, Aqmola oblysy Ereimentaý aýdany Órnek eldi mekeniniń aýmaǵynda májbúrli túrde qondy (Nur-Sultan qalasynan shamamen 100 km). Bortta 5 adamnan turatyn ekipaj, 2 dáriger boldy. Májbúrli qonýdyń aldyn ala sebebi - oń qozǵaltqyshtyń terbelisi. Tikushaq aman-esen qondy, zardap shekkender joq. Ekipaj men dárigerler rezervtik áýe kemesimen shyǵaryldy. Mi-8AMT tikushaǵy kepildikte tur, óndirýshi zaýytpen birlesip áýe kemesiniń inspektsiiasy oryndalatyn bolady», - dep túsindirdi tilshi saýalyna «Qazaviaqutqarý» AQ baspasóz qyzmetindegiler.
Aita ketsek, bul týraly búgin saǵat 12:40-ta Aqmola oblysy TJD daǵdarystyq jaǵdailar basqarmasyna habar túsken bolatyn.
