«Qazatomónerkásip» ulttyq kompaniiasynyń basqarma tóraǵasy Májit Sháripov 2021 jyldyń negizgi kórsetkishterin baiandady, dep habarlaidy QazAqparat.
«Qazirgi qubylmaly jaǵdaiǵa qaramastan 2021 jyly Qazatomónerkásip jaqsy nátije kórsetti. 2021 jyly shoǵyrlandyrylǵan túsim 2020 jylmen salystyrǵanda 18%-ǵa ulǵaiyp, 691 mlrd teńgeni qurady. Bul negizinen spot baǵasynyń ósýine jáne teńgeniń AQSh dollaryna qatysty álsireýine bailanysty satýdyń ortasha baǵasynyń ósýi esebinen jáne ótken jylmen salystyrǵanda satý kóleminiń azdap ulǵaiýyna bailanysty boldy», - dedi Sháripov kompaniianyń 2021 jylǵy jumys qorytyndylary týraly baspasóz máslihatynda.
Onyń aitýynsha, 2021 jyly taza paida 2020 jylmen salystyrǵanda 10%-ǵa ulǵaiyp, 220 mlrd teńgeni quraǵan.
Ýran óndirisiniń kólemi ótken jylmen salystyrǵanda 12%-ǵa ulǵaiyp, 100 paiyzdyq negizde 21 819 tonnaǵa jetken.
2021 jyly pandemiia búkil óndiris tizbegine áser etip, bul negizgi materialdar men jabdyqtardyń jetispeýine ákep soqty.
Sondai-aq ken oryndaryn igerý men óndirý kestelerine tigen teris áserden 2021 jylǵa arnalǵan boljamdarǵa qatysty kórsetkishter tómendegen.
«2021 jyly shoǵyrlandyrylǵan satý kólemi 2020 jylǵy kólemge uqsas boldy. Ýrannyń spottyq baǵasynyń ósýi jáne teńgeniń AQSh dollaryna qatysty álsireýi arqyly toptyń ortasha satý baǵasy 2021 jyly 1 kilogramm úshin 36 677 teńgeni (bir fýnt úshin 33,11 AQSh dollaryn) qurady, bul 2020 jylmen salystyrǵanda 16%-ǵa joǵary», - dedi Sháripov.
