Belgisiz bireýler Tatarstan astanasy Qazan qalasyndaǵy Jaýdat Faizi kóshesinde ornalasqan №175 gimnaziiada atys shyǵardy, - dep habarlaidy "Ult aqparat".
Oqiǵa seisenbi kúni, Jaýdat Faizi kóshesinde ornalasqan mektepte sabaq ótip jatqan kezde bolǵan. Mektepten oqýshylardy shuǵyl túrde terezeden shyǵarýǵa týra kelgen dep habarlaidy basylymdar. Mektep saityndaǵy aqparatqa sáikes, bilim mekemesinde myńnan astam shákirt oqidy, 57 muǵalim jumys isteidi.
BAQ málimetinshe, belgisiz adamdar mektepke qarýmen kirgen.
Keiin mektep ǵimaratynda jarylys bolǵany habarlandy.
Tótenshe jaǵdai ornyna 20-dan asa jedel járdem brigadasy jiberildi.
RIA Novosti málimetinshe, qaýipsizdik qyzmetkerleri mektepte oq atty degen kúdiktini ustady. Bul - 19 jastaǵy jasóspirim. Al oǵan kómektesken ekinshi azamatty arnaiy operatsiia kezinde atyp tastaǵan.
Mash basylymy da buryn osy mektepte bilim alǵan, keiingi tórt jyl boiy tehnikýmda oqyp júrgen 19 jastaǵy jas jigit qylmysqa kúdikti retinde ustalǵanyn rastap otyr. Ol úiine bomba qoiylǵany týraly politsiiaǵa habarlaǵan degen aqparat tarady.
Sońǵy derekter boiynsha, atys saldarynan 9 adam qaza taýyp, taǵy birneshe adam zardap shekken.
Tatarstan prokýratýrasy oqiǵa ornyna respýblika prokýrory Ildýs Nafikov bara jatqanyn habarlady. Tatarstan Prezidenti de sol jerge attanǵan.
