Qazan aiynda Reseiden 100 myń tonna AI-92 benzini importtalady. Bul týraly búgin Úkimettiń selektorlyq rejimdegi otyrysynda QR Energetika ministri Qanat Bozymbaev aitty, dep habarlaidy Ult.kz tilshisi QazAqparat agenttigine silteme jasap.
«Kún tártibine kirispes buryn janarmai jáne kómirmen qamtamasyz etý máselesine taǵy da bir ret toqtalǵym kelip otyr. Ótken aptada memlekettik organdar men ákimder barlyq máseleler jýyq arada sheshiledi dep sendirgen bolatyn. Osyǵan bailanysty birqatar málimetterdi jaýapty qyzmetkerlerden alǵym kelip otyr», - degen Úkimet basshysy Baqytjan Saǵyntaev alǵashqy sózdi Energetika ministrligine berdi.
Óz kezeginde ol respýblikadaǵy benzinge qatysty jaǵdaidy turaqtandyrý úshin ministrlik ótken aptada birqatar sharany qabyldaǵanyn atap ótti.
«Birinshi, qazan aiynda Shymkent jáne Atyraý zaýyttarynda mynalardyń esebinen AI-92 benzinin óndirý kólemi 130-dan 165 myń tonnaǵa deiin ulǵaidy: Shymkent zaýytyn munaimen barynsha júkteý 380-nen 490 myń tonnaǵa deiin ulǵaityldy jáne eki zaýytta da AI-95 benzinin óndirýdi toqtatý esebinen AI-92 benzini qosymsha shyǵaryldy. Ekinshi, Batys Qazaqstan oblysyndaǵy «Kondensat» AQ-yna jeńil munaidyń 20 myń tonnaǵa deiingi kólemin qosymsha jetizý uiymdastyrylyp, sonyń arqasynda osy aida qosymsha 4,5 myń tonna AI-92 shyǵarylatyn bolady. Munyń barlyǵy 130 myń tonnaǵa josparlanǵan AI-92 óndirisin 170 myńǵa deiigi jiyntyq ósimin beredi», - dedi ministr.
Sonymen qatar ol RF Energetika ministrligimen, RostNeft, GazPromNeft, RýsNeft kompaniialarynyń basshylarymen kelissózder júrgizgenin jáne RF munai óndeý zaýyttarynan 100 myń tonnadan astam AI-92 benzinin alý ýaǵdalastyǵyna qol jetkizgenin basa aitty.
«Atalǵan 100 myń tonnanyń shamamen 50 myń tonnasy osy aptanyń sońyna deiin tieletin bolady. Qalǵan kólemi aidyń sońyna deiin jetkiziledi. Aidyń basynan beri AI-92 benzininiń 34,6 tonnasy importtaldy. Onyń 10 myń tonnasy ótken demalys kúnderi jetkizildi», - dedi Bozymbaev.
