قازان ايىندا رەسەيدەن 100 مىڭ توننا اي-92 بەنزينٸ يمپورتتالادى. بۇل تۋرالى بٷگٸن ٷكٸمەتتٸڭ سەلەكتورلىق رەجٸمدەگٸ وتىرىسىندا قر ەنەرگەتيكا مينيسترٸ قانات بوزىمباەۆ ايتتى, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
«كٷن تەرتٸبٸنە كٸرٸسپەس بۇرىن جانارماي جەنە كٶمٸرمەن قامتاماسىز ەتۋ مەسەلەسٸنە تاعى دا بٸر رەت توقتالعىم كەلٸپ وتىر. ٶتكەن اپتادا مەملەكەتتٸك ورگاندار مەن ەكٸمدەر بارلىق مەسەلەلەر جۋىق ارادا شەشٸلەدٸ دەپ سەندٸرگەن بولاتىن. وسىعان بايلانىستى بٸرقاتار مەلٸمەتتەردٸ جاۋاپتى قىزمەتكەرلەردەن العىم كەلٸپ وتىر», - دەگەن ٷكٸمەت باسشىسى باقىتجان ساعىنتاەۆ العاشقى سٶزدٸ ەنەرگەتيكا مينيسترلٸگٸنە بەردٸ.
ٶز كەزەگٸندە ول رەسپۋبليكاداعى بەنزينگە قاتىستى جاعدايدى تۇراقتاندىرۋ ٷشٸن مينيسترلٸك ٶتكەن اپتادا بٸرقاتار شارانى قابىلداعانىن اتاپ ٶتتٸ.
«بٸرٸنشٸ, قازان ايىندا شىمكەنت جەنە اتىراۋ زاۋىتتارىندا مىنالاردىڭ ەسەبٸنەن اي-92 بەنزينٸن ٶندٸرۋ كٶلەمٸ 130-دان 165 مىڭ تونناعا دەيٸن ۇلعايدى: شىمكەنت زاۋىتىن مۇنايمەن بارىنشا جٷكتەۋ 380-نەن 490 مىڭ تونناعا دەيٸن ۇلعايتىلدى جەنە ەكٸ زاۋىتتا دا اي-95 بەنزينٸن ٶندٸرۋدٸ توقتاتۋ ەسەبٸنەن اي-92 بەنزينٸ قوسىمشا شىعارىلدى. ەكٸنشٸ, باتىس قازاقستان وبلىسىنداعى «كوندەنسات» اق-ىنا جەڭٸل مۇنايدىڭ 20 مىڭ تونناعا دەيٸنگٸ كٶلەمٸن قوسىمشا جەتٸزۋ ۇيىمداستىرىلىپ, سونىڭ ارقاسىندا وسى ايدا قوسىمشا 4,5 مىڭ توننا اي-92 شىعارىلاتىن بولادى. مۇنىڭ بارلىعى 130 مىڭ تونناعا جوسپارلانعان اي-92 ٶندٸرٸسٸن 170 مىڭعا دەيٸگٸ جيىنتىق ٶسٸمٸن بەرەدٸ», - دەدٸ مينيستر.
سونىمەن قاتار ول رف ەنەرگەتيكا مينيسترلٸگٸمەن, روستنەفت, گازپرومنەفت, رۋسنەفت كومپانييالارىنىڭ باسشىلارىمەن كەلٸسسٶزدەر جٷرگٸزگەنٸن جەنە رف مۇناي ٶندەۋ زاۋىتتارىنان 100 مىڭ توننادان استام اي-92 بەنزينٸن الۋ ۋاعدالاستىعىنا قول جەتكٸزگەنٸن باسا ايتتى.
«اتالعان 100 مىڭ توننانىڭ شامامەن 50 مىڭ تونناسى وسى اپتانىڭ سوڭىنا دەيٸن تيەلەتٸن بولادى. قالعان كٶلەمٸ ايدىڭ سوڭىنا دەيٸن جەتكٸزٸلەدٸ. ايدىڭ باسىنان بەرٸ اي-92 بەنزينٸنٸڭ 34,6 تونناسى يمپورتتالدى. ونىڭ 10 مىڭ تونناسى ٶتكەن دەمالىس كٷندەرٸ جەتكٸزٸلدٸ», - دەدٸ بوزىمباەۆ.
