Qazaqtyń asar dástúrin zamanǵa sai qaita jańǵyrtýymyz qajet. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aitty, dep habarlaidy QazAqparat.
«Volonter jyly barshamyzǵa, ásirse jastarǵa úlken jaýapkershilik júkteidi. Sondyqtan sizderdi osy igi bastamaǵa belsendi atsalysýǵa shaqyramyn. Jastarymyz muqtaj jandarǵa kómek qolyn sozýǵa árdaiym daiyn bolýy kerek. Dana qalqymyz «Jumyla kótergen júk jeńil» degen. Qaiyrymdylyq pen meiirimdilik qanymyzǵa sińgen qasiet. Qazaqta asar jasap, bir-birine kómektesip, qoldaý kórsetý dástúri bar. onyń volonterlikpen úndesetindigi sózsiz. Sondyqtan aldaǵy jyly sol dástúrdi zamanǵa sai qaita jańǵyrtýymyz qajet», - dedi Memleket basshysy.
QR Prezidenti osy jalpyulttyq bastamanyń negizgi qozǵaýshy kúshi jastar ekendigin basa aitty.
«Bul iste biz belsendi jastarymyzǵa zor senim artamyz. Elge qyzmet etý tek bilimdi ǵana emes, namysty da talap etedi. jas urpaqtyń ar-namysy joǵary bolsa, memleketimizdiń mártebesi biik bolady. Qazirgi jastar Baýyrjan Momyshulynyń «Otan úshin otqa tús, kúimeisiń» degen sózin berik ustanýy kerek. Óitkeni, Táýelsiz Qazaqstannyń tuǵyrly tiregi, úkili úmiti, berik qalqany ózderińiz. Qairatty jastarymyz kóp bolsa, memleketimizdiń bolashaǵy baiandy bolady dep senemin», - dedi Qasym-Jomart Toqaev.
