Bizde qyzyq ózi. Saiasattyń saldary ma, ideologiialyq qaqtyǵys pa, áiteýir qandaida bir tarihi film túsirilse – onyń arty mindetti túrde daý-damaiǵa ulasady. Máselen, Satybaldy Narymbetovtiń «Amanat» kartinasy kinosynshylar men kórermen tarapynan joǵary baǵalandy. Biraq kópshiliktiń kóńilinen shyqqan tarihi týyndyny kinoteatrlar yńǵaisyz ýaqytqa qoiyp tastaǵan.
Satybaldy Narymbetovtiń «Amanat» kartinasy – qazaq kinosynyń sońǵy ýaqyttaǵy úlken tabysy dep qazirden aitýǵa bolatyn siiaqty. Bul belgili telejýrnalist ári alashtanýshy Bolat Múrsálimniń pikiri. Onyń aitýynsha, «Amanat» filmi «Qyz Jibek», «Meniń atym – Qoja» siiaqty 20-30 jyl, tipti, jarty ǵasyr boiy ekrannan túsirmei kórýge bolatyn kino. Biraq bul kino tek túnde kórsetiletindikten, Bolat Múrsálim ony tamashalaýǵa kelýshilerdiń sany az ekenin aityp, qynjylys bildirdi.
Rasynda «Amanat» filmin kórýshilerdiń qatary az bolyp otyr. Óitkeni kinoteatrlar
tarihi týyndyny tańǵy saǵat 11:00-ge, nemese túngi saǵat 00:00-ge qoiyp tastaǵan.
Al buǵan deiin jaryq kórgen «16 qyz» atty film ózin-ózi aqtap, az da bolsa tabys túsirgen edi.
Qazaq kinosyn nege yńǵaisyz ýaqytqa qoiady?
Ańsaǵan Mustafa
Osy rette kinotýyndynyń tabysty bolýyna belgili bloger Ańsaǵan Mustafanyń eńbegi sińgenin aityp ótken jón. Ol da qazaq kinolary yńǵaisyz ýaqytqa qoiylǵandyqtan ózin-ózi aqtamaidy degen pikirde. Adamdar kinoǵa keshke úige kelip, tamaǵyn iship alǵannan keiin barǵysy keledi.
– Kinoteatrlar yńǵaily ýaqytqa qazaq filmderin qoimaidy. Sondyqtan da «qazaq kinosy ózin-ózi aqtamaidy» degen áńgime shyǵyp jatyr. «16 qyz» kinosy bastalǵanda biz ádeii kinoteatrlarda qoiylǵan ýaqyttardy tekserdik. Eger qolaisyz ýaqyttarǵa qoiylsa, kinoteatr basshylyǵyna arnaiy baryp eskertý jasadyq. Máselen,
Taraz qalasynda «16 qyzdy» kúnine 1 ret, eń soraqsy – tańǵy 10-ǵa qoiyp qoiǵan eken. Tańǵy saǵat 10-da kim kinoteatrǵa baryp kino kóredi?
Osydan keiin áleýmettik jelide bul máseleni talqyǵa salyp, shý shyǵara bastadym. Úshinshi kúni elder shýlap jatqan soń kinoteatrlar amalsyzdan «16 qyzdy» yńǵaily ýaqytqa qoiýǵa májbúr boldy – deidi Ańsaǵan Mustafa.
Onyń aitýynsha, qazaq kinolarynyń kóp kóretilýine Mádeniet jáne sport ministrligi qoldaý kórsetýi kerek. Máselen, bloger ministrlik tarapynan kinoteatr basshylyǵyna qysym jasalsa, bul másele ońynan sheshiler edi dep oilaidy.
Kinoteatrlarmen sottasý kerek!
Abzal Quspan
Alaida Ańsaǵan Mustafanyń pikirimen belgili quqyq qorǵaýshy Abzal Quspan kelispei, óz oiyn aityp otyr. Quqyq qorǵaýshynyń pikirinshe, ministrlik jeke kásipkerlikpen ainalysyp otyrǵan kinoteatrdyń basshylyǵyna qysym jasai almaidy. Alaida ol otandyq kinolardy yńǵaily ýaqytqa qoiyp nasihattaýdyń joldary bar ekenin aityp berdi.
– Qazaq kinolarynyń yńǵaisyz ýaqytqa qoiylatyny týraly kópten beri aitylyp júr. Alaida bul másele áli kúnge deiin sheshimin tapqan emes. Buǵan, árine, ministrlik pen Sháken Aimanov atyndaǵy «Qazaqfilm» kinostýdiiasyn kinálaýǵa bolatyn shyǵar. Alaida, eń basty másele – azamattardyń ózinde bolyp otyr. Kez-kelgen adam tutynýshy retinde óziniń quqyǵyn qorǵap úirenýi kerek. Aitalyq, siz ózińizge yńǵaily ýaqytta kino kóre almasańyz, jazbasha túrde kinoteatrdyń basshylyǵyna shaǵym jazyńyz. Eger shaǵymyńyzǵa qulaq aspasa, onda amal joq, kinoteatrdy sotqa berýge týra keledi. Óitkeni sizdiń tutynýshy retinde quqyǵyńyz buzylyp jatyr. Al elimizdiń «Tutynýshylardyń quqyǵyn qorǵaý týraly» zańyna sai, árbir adam óz quqyǵyn qorǵap, ádildikke jete alady, – deidi quqyq qorǵaýshy.
Sóz sońynda Abzal Quspan
«eger azamattar qazaq kinosynyń yńaisyz ýaqytta qoiylatynyna bailanysty kinoteatrmen sottasqysy kelse, men olarǵa kómekteser edim»
dedi. Alaida ol kópshilik qaýym sottasyp, ýaqytyn zaia ketirgisi kelmeitinin tilge tiek etti.
Aita ketsek, kezinde amerikalyq qara násildi adamdar ózderiniń quqyǵyn sottasý arqyly qorǵaǵan bolatyn. Sonyń arqasynda, búginde AQSh-ty qara násildi Barak Obama basqaryp otyr.
Serǵali Aslanbek
