Foto: Instagram Ekateriny Bivol
Bokstan álem chempiony Dmitrii Bivol burynǵy jubaiy Ekaterina Bivolǵa qarsy "jala jabý" deregi boiynsha sotta jeńiske jetti, dep habarlaidy Ult.kz.
Sankt-Peterbýrg sottarynyń baspasóz qyzmetiniń habarlaýynsha Sankt-Peterbýrg qalasynyń Smolnin aýdandyq soty Dmitrii Bivoldyń Ekaterina Bivolǵa qatysty bergen azamattyq talabyn qarady. Talap aryzda shyndyqqa sáikes kelmeitin, ar-namysyna, qadir-qasietine jáne iskerlik bedeline nuqsan keltiretin málimetterdi jalǵan dep taný, sondai-aq olardy teriske shyǵarý mindetin júkteý suralǵan. Sot aryzdy qanaǵattandyrdy.
"Is materialdaryna sáikes, jaýapker 16.09.2024–11.08.2025 aralyǵynda Resei Federatsiiasynyń aýmaǵynda tyiym salynǵan «Instagram» áleýmettik jelisinde talapkerge qatysty bedeline nuqsan keltiretin málimetter jariialaǵan. Sonymen qatar, 21.07.2025–11.08.2025 aralyǵynda «Telegram» messendjerinde mátin formatyndaǵy pikirler men jariialanymdar ornalastyrǵan.
Sot jaýapker taratqan málimetterdi shyndyqqa sáikes kelmeidi ári talapkerdiń ar-namysyna, qadir-qasietine jáne iskerlik bedeline nuqsan keltiredi dep tanydy. Osyǵan bailanysty Ekaterina Bivolǵa ózine tiesili (ózi basqaratyn) barlyq saittarda, áleýmettik jelilerdegi paraqshalarynda jáne messendjerlerdegi arnalarda (toptarda) atalǵan málimetterdi teriske shyǵarýdy mindettedi. Teriske shyǵarý osy is boiynsha sot sheshiminiń qarar bóligin jariialaý arqyly júzege asyrylýy tiis, sondai-aq úshinshi tulǵalardyń tanysýy úshin ashyq qoljetimdilik qamtamasyz etilip, ol jariialanǵan kúnnen bastap alty ai boiy saqtalýy qajet" delingen habarlamada.
Aita keteiik, Ekaterina Bivoldyń burynǵy jubaiyna qatysty ǵana aitqan sózderine sot sheshimi shyqty. Budan bólek Qazaqstanda Ekaterina Bivolǵa izdeý jariialanǵan bolatyn.
Buǵan deiin ol áleýmettik jelilerde qazaqtar men qyrǵyzdardy qorlaityn video jariialaǵan. 7 qazanda Qyrǵyzstanda oǵan qatysty qamaýǵa alý týraly order berilgen. Artynsha Qazaqstan quzyrly organdary da Ekaterina Bivolǵa izdeý jariialady.
Keiinirek, eger ol ustalǵan jaǵdaida, Qazaqstan tarapy boksshynyń burynǵy jubaiyn Reseiden ekstraditsiialaýdy suraýy múmkin ekeni belgili boldy.
Dmitrii Bivol - Qyrǵyzstannyń týmasy, anasy Qazaqstannan. Reseilik jáne qyrǵyzstandyq kásipqoi boksshy, jartylai aýyr salmaq dárejesinde óner kórsetedi.
