Qazaqstan Eýropa keńesiniń Sybailas jemqorlyqqa qarsy memleketter toby (GREKO) bastamasyna qosyldy.
Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov málim etti, dep habarlaidy QazAqparat.
«Depýtattyq korpýstyń qoldaýynyń arqasynda, kelisimdi ratifikatsiialaý týraly qujat Parlamenttiń qos palatasymen qysqa merzimde qabyldandy. 2019 jyldyń 30 jeltoqsanynda Memleket basshysy tiisti Zańǵa qol qoidy. Osy sátten bastap Qazaqstan GREKO-nyń 50-shi jańa múshesi atandy», - dedi O. Bektenov Ortalyq kommýnikatsiialar qyzmetindegi baspasóz máslihatynda.
Osy oraida ol atalǵan uiymǵa músheliktiń basymdyqtary týraly aityp berdi.
«Birinshi kezekte, Eýropa Keńesi sarapshylary sybailas jemqorlyqqa qarsy zańnamaǵa únemi monitoring júrgizip túrady. Bul turǵyda álemdik úzdik tájiribelerge, halyqaralyq normativtik-quqyqtyq aktilerge sáikestik baǵyty nazarda bolady. Monitoringtiń árbir raýndynyń qorytyndysy boiynsha elimizge tiisti usynystar jasalady, iaǵni jemqorlyqqa qarsy is-qimyl tiimdiligin arttyrý maqsatynda zańnamaǵa ózgerister nemese uiymdastyrý sharalaryn qabyldaý qadamdary pysyqtalady», - dedi ol.
Belgili bolǵandai, atalǵan usynystar men keńesterdi oryndaý úshin memleketke 18 ai merzimi beriledi. Sonymen qatar, bul merzimdi jarty jylǵa uzartý múmkindigi qarastyrylǵan. Osydan keiin sarapshylar usynystarynyń oryndalýy deńgeiine baǵa beriledi.
Aita keteiik, GREKO-ǵa qosylý arqyly Qazaqstan sarapshylary da Eýropa Keńesiniń baǵalaý toptary quramyna enetin bolady. Bul rette GREKO-ǵa qatysýshy ózge de elderdegi monitoringtik sharalarda qamtylady.
Onyń sózine qaraǵanda, GREKO-ǵa qosylý Eýropa Keńesiniń sybailas jemqorlyq úshin qylmystyq jaýapkershilik týraly konventsiiasyn ratifikatsiialaýǵa jol ashady. Bul óz kezeginde qylmyskerlerdi ekstraditsiialaý, olardyń zańsyz tapqan múlkin qaitarý máseleleri boiynsha Eýropa elderimen yntymaqtastyqty kúsheitýge múmkindik beredi.
Budan buryn habarlanǵandai, ótken jyldyń sońynda Parlament Senatynyń jalpy otyrysynda «Qazaqstan men Eýropa Keńesi arasyndaǵy Sybailas jemqorlyqqa qarsy memleketter toby ókilderiniń jáne baǵalaýshy toptar músheleriniń (GREKO) artyqshylyqtary men immýnitetterine qatysty kelisimdi ratifikatsiialaý týraly» Zańy qabyldandy.
