«Qazaqstanda Armeniiadaǵydai óz narazylyǵyn bildiretin quqyqtyq alań joqtyń qasy. Tipti, bizde oppozitsiiaǵa da oryn joq. Sondyqtan saiasi turalaýǵa ushyraǵan Qazaqstannyń jaǵdaiy Armeniiadan da nashar. Bizdiń media portalǵa bergen suhbatynda saiasattanýshy Dosym Sátpaev eki eldiń saiasi jaǵdaiyn osylaisha salystyrdy», — dep jazady kaz.365info.kz portaly.
Armeniiada beibit sherý ótip jatqanyna 1 aidan asqanyn eske sala ketelik. Erevanda politsiia bólimshesi basyp alyndy. Qazir politsiia qyzmetkerlerin kepilge alǵandar armian oppozitsiianyń kóshbasshysyn bosatýdy talap etip jatyr. Al kóshede «Armiandarsyz Armeniia!» degen urandy alyp shyqqan halyq prezident pen úkimettiń bilikten ketýin qalaidy.
Resei Armeniiany satyp ketti
Saiasattanýshy Dosym Sátpaev Armeniiada beibit sherýlerdiń ótýi, saiasi ómirdiń belsendiligi — qalypty jaǵdai dep esepteidi. Osy jaǵynan alǵanda, bul memlekette postkeńestik elder ishinde demokratiia qundylyǵy áldeqaida jaqsy saqtalǵan.
— Alaida sońǵy jait, iaǵni oppozitsiia beibit is-qimyldan kúshteýge kóshýi munda da sóz bostandyǵy, tańdaý erkindiginiń taptalyp jatqanyn baiqatady, — deidi ol.
Qalai degenmen de, saiasattanýshy Armeniiadaǵy narazylyqtyń kúsheiýine 3 faktor úlken áser etip otyrǵanyn aitady.
— Birinshiden, oppozitsiia qatty qysym kórip, qýdalaýǵa ushyrap jatyr.
Ekinshiden, qazir Armeniia ekonomikasy aýyr kezeńdi bastan keshirýde. Olardyń ekonomikasy Reseige qatty táýeldi. Al Reseidiń jaǵdaiy qazir máz emes ekeni belgili. Jaǵdaiymyzdy túzeidi degen Eýraziialyq ekonomikalyq odaq ta óz paidasyn ákelmedi. Tek kóshi-qon máselesinde ǵana bolmasa, bylai odan úlken septik joq. Sondyqtan armian halqynyń basym bóligi osy odaqtan shyǵýdy qalaidy.
Úshinshiden, Qarabahtaǵy sońǵy jaǵdaidy alaiyq. Armeniiamen jaýlasýshy tarap — Ázirbaijanǵa Resei qarý-jaraq satty.
Osylaisha bir odaqqa qosylyp, senim artqan basty dos eli Armeniiany satyp ketti.
Bul jaǵdaidy eýropalyq qundylyqty qoldaityn el ishindegi saiasi kúshter ońtaily paidalanyp jatyr.
Biraq Armeniianyń saiasi ómiri Qazaqstannan qatty erekshelenedi. Onda memleket basshylary, Úkimet jii aýysady.
Sondyqtan bul joly da taraptar kelissóz ústeline otyryp, jaǵdaidy demokratiialyq turǵyda sheshýge shamalary jetip qalady dep oilaimyn.
Al Belarýs prezidenti Aleksandr Lýkashenkonyń: „Bizge Armeniia men Qazaqstandaǵy jaǵdaidyń keregi joq„ dep eki eldegi jaǵdaidy mysal etkeni tipten negizsiz„ — deidi Dosym Sátpaev.
Qazaqstanda oppozitsiia joq. Onyń ornyn radikaldar basqan!
Onyń pikirinshe,
búginderi saiasi turalaýǵa ushyraǵan Qazaqstannyń jaǵdaiy Armeniiadan da nashar. Qazaqstanda Armeniiadaǵydai óz narazylyǵyn bildiretin quqyqtyq alań joqtyń qasy. Tipti, oppozitsiiaǵa da oryn joq.
— Burynnan kele jatqan eski oppozitsiia saiasi sahnadan ketti. Árine, oǵan biliktiń at salysqany sózsiz. Al onyń ornyna jańa oppozitsiialyq kúsh kelgen joq. Bul aradaǵy oryn úńireiip qaldy. Soǵan bailanysty qazir qaýipti jaǵdailar týyndai bastady.
Bilik eshkimdi jolatqysy kelmegen osy bos oryndy demokratiialyq, zańdy emes, ásire radikaldyq oiynshylar kelip toltyra bastady.
Saiasattanýshy ekstremister de óz oiyn, narazalyǵyn aita almai júrgender ekenin este shyǵarmaý kerektigin aitady.
«Tipti Almatydaǵy atys kezindegi qylmyskerdi kek alýshy dep te aityp jatty. Demek, ol qoǵamnyń narazy múshesi. Sondyqtan bilik halyqqa óz oiyn aitatyn quqyqtyq alańqaidy usyný jaǵyn mindetti túrde oilanýy kerek», — deidi Dosym Sátpaev.
Árine, bizde zań boiynsha sherýge shyǵýǵa bolady. Alaida oǵan ruqsatty jergilikti ákimshilik beredi deimiz. Al ákimshiliktiń sherýge ruqsat berýi ekitalai. Buǵan jer daýyna qatysty narazylyqqa tyiym salyný jaqsy mysal bola alatynyn basa aita ketelik. Qazir jer reformasy týraly komissiia jumys istep jatyr.
Biraq aty aityp turǵandai, qamtylatyn taqyryby boiynsha Jer komissiiasynyń talqy alańqaiy belgili bir shekteýge ie.
Soǵan qaramastan, ol arada úshtildilikke qarsy, quqyq qurylymyndaǵy ádiletsizdik pen barlyq salada keńinen etek jaiǵan sybailas jemqorlyq máseleleri qozǵalyp jatyr. Osydan-aq elimizde bilikpen kelissóz júrgizetin alańdardyń aýadai qajettilik tanytyp turǵanyn anyq ańǵarýǵa bolady.
Kamshat Satieva
