2020 jyly Qazaqstannyń úshinshi eldermen taýar ainalymy 14 paiyzǵa tómendedi. Bul týraly Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Memlekettik biýdjetke 9 trln 751 mlrd teńge somasynda kirister tústi nemese jospar 102,7 paiyz atqaryldy. Respýblikalyq biýdjetke 6 trln 561 mlrd teńge somasynda kirister tústi nemese jospar 100,3 paiyzǵa oryndaldy. Kirister boiynsha jospar 22 mlrd teńgege artyǵymen oryndaldy, onyń ishinde salyqtar - 16 mlrd teńgege. Salyqtar boiynsha negizgi asyra oryndaý somasy korporativtik tabys salyǵyna, paidaly qazbalar óndirýge salynatyn salyqqa jáne shiki munaiǵa eksporttyq keden bajdaryna tiesili», - dedi ministr
Onyń dereginshe, korporativtik tabys salyǵy boiynsha jospardy asyra oryndaý iri salyq tóleýshiler tólemderiniń ósýine bailanysty. Paidaly qazbalar óndirýge salynatyn salyq boiynsha asyra oryndaýdyń negizgi sebebi tústi metaldardy óndirý kóleminiń ulǵaiýy boldy. Al shiki munaiǵa eksporttyq keden bajy boiynsha asyra oryndaý eksporttyq keden bajy mólsherlemesiniń bir barrel úshin 20-dan 40 AQSh dollaryna deiin ósýine bailanysty.
«Sonymen birge, jospar qosylǵan qun salyǵy boiynsha boiynsha 256 mlrd teńgege atqarylmady. Atqarylmaý sebepteri: 2019 jylmen salystyrǵanda qosylǵan qun salyǵyn qaitarý 1,5 esege nemese 236 mlrd teńgege ósken; «Elektrondyq shot-faktýralar» aqparattyq júiesi derekterine sáikes satý boiynsha ainalymdar 14 paiyzǵa azaidy. Negizgi tómendeý taý-ken ónerkásibi salasyna tiesili. Onda ainalymdar burnaǵy jyldyń 11 aiymen salystyrǵanda 42 paiyzǵa nemese 8 trln teńgege kemigen. 2019 jylmen salystyrǵanda Qazaqstan Respýblikasynyń úshinshi eldermen taýar ainalymy 14 paiyzǵa tómendedi», - dedi Erulan Jamaýbaev.
