Nursultan Nazarbaev «Áziret Sultan» tarihi-mádeni qoryǵynyń aýmaǵynda ornalasqan interaktivti etnoaýylǵa bardy, dep habarlaidy Elbasy.kz saity.
Elbasy etnoaýyldaǵy qolónershiler kóshesin aralady. Qolónershiler kóshesinde aǵash ustalarynyń, toqymashylar men kiiz basýshylardyń, qysh buiym jasaityn sheberlerdiń, zergerlerdiń, tas qashaýshylardyń 5 túrli taqyryptyq sheberhanasy qamtylǵan. Nursultan Nazarbaev etnoaýyldaǵy kóshpendiler ashanasyn da tamashalady.
Jańa nysan 18 ǵasyrdan kórinis beretin keshen Ahmet Iasaýi kesenesiniń janynda ornalasqan.
Etnoaýyl qazaq dalasynyń XVIII-XIX ǵasyrdaǵy ómirin beineleitin joba sanalady. «Áziret Sultan» mádeni qoryǵynyń býferlik aimaǵy men Ahmet Iasaýi kesenesiniń bekinis qabyrǵasy, etnografiialyq murajaidyń ortasynda oryn tepken. Interaktivti etno-aýyldyń aýdany 16 myń sharshy metrdi quraidy. Kesenege kelýshiler qazaq halqynyń bai mádenietimen tanysyp, tipti kóne zattardy qoldarymen ustai alady. Kóshpediler órkenietinen kórinis beretin etnoaýyldyń aimaǵynda qazaq dalasyndaǵy tutas bir dáýir beinelengen.
