Qazaqstan Respýblikasynyń Syrtqy ister ministri Beibit Atamqulov Qytai Halyq Respýblikasyna resmi saparmen keldi. Sapar barysynda syrtqy saiasi vedomstvo basshysy QHR Memlekettik keńesiniń múshesi, Syrtqy ister ministri Van Imen eki jaqty kelissóz júrgizdi, dep habarlaidy "Ult aqparat" vedomstvonyń baspasóz qyzmetine silteme jasap.
Taraptar Qazaqstan-Qytai arasyndaǵy saiasi, saýda-ekonomikalyq jáne mádeni-gýmanitarlyq salalardaǵy yntymaqtastyǵyn odan ári damytýdyń ózekti máselelerin talqylady jáne halyqaralyq kún tártibindegi máselelerdiń keń aýqymy boiynsha pikir almasty.
Qazaqstandaǵy ishki saiasi ózgerister aiasynda B.Atamqulov qytai tarapyna eldiń syrtqy saiasatynyń ózgermeitindigi jáne halyqaralyq mindettemelerin oryndaý týraly habardar etti.
«Biz jan-jaqty strategiialyq seriktestiktiń jańa kezeńiniń qarym-qatynastaryn nyǵaitýǵa jáne tereńdetýge degen mindettemelerimizdi rastaimyz», - dedi QR SIM basshysy.
Sonymen birge ol «Qazaqstan men Qytai arasyndaǵy qarym-qatynas - ózara utymdy jáne tiimdi yntymaqtastyqtyń úlgisi» dep atap ótti.
Óz kezeginde, Qytai tarapy Qazaqstan Respýblikasynyń Tuńǵysh Prezidenti - Elbasy Nursultan Nazarbaevtyń Qazaqstan-Qytai jan-jaqty strategiialyq seriktestigin ornatýdaǵy, «Beldeý jáne jol» bastamasyn birlesip qurýdaǵy yntymaqtastyqty tereńdetý boiynsha tarihi rólin joǵary baǵalady.
Kelissózder barysynda eki el arasyndaǵy óńiraralyq jáne shekara mańyndaǵy seriktestik formattarynda, sondai-aq ónerkásiptik jáne investitsiialyq salada, ekonomikany tsifrlandyrý jáne tehnologiialyq jańǵyrtý salada praktikalyq yntymaqtastyqqa erekshe nazar aýdaryldy. «Jibek jolynyń ekonomikalyq beldeýi» bastamasyn «Nurly jol» Jańa ekonomikalyq saiasatymen jáne Eýraziialyq ekonomikalyq odaqtyń integratsiialyq baǵdarlamalarymen tiimdi ushtastyrýǵa úlken nazar aýdarylady.
Sonymen qatar, Qazaqstan men QHR syrtqy saiasi vedomstvolarynyń basshylary BUU, Shanhai yntymaqtastyq uiymy, Aziiadaǵy ózara yqpaldastyq jáne senim sharalary keńesi jáne t.b. halyqaralyq uiymdar jáne integratsiialyq birlestikter aiasyndaǵy yntymaqtastyq, Ortalyq Aziiadaǵy turaqtylyq pen qaýipsizdikti qamtamasyz etý máselelerin qarastyryp, transshekaralyq sý resýrstarynyń máseleleri jóninde pikir almasty.
Kelissóz barysynda QHR aýmaǵynda turatyn etnikalyq qazaqtardyń jaǵdaiy sóz boldy. Eki eldiń SIM arasyndaǵy jumys bailanysy arqyly týyndaityn máselelerdi sheshýge ózara múddelilik atap ótilip, konsýldyq qyzmetterdiń jumysyn jandandyrý týraly ýaǵdalastyqqa qol jetkizildi.
Kelissóz qorytyndysy boiynsha Qazaqstan men Qytai syrtqy saiasi vedomstvolary arasynda 2020-2022 jyldarǵa arnalǵan Yntymaqtastyq týraly memorandýmǵa qol qoiyldy.
Sol kúni Qazaqstan SIM basshysy QHR Kommertsiia ministri Chjýn Shanmen kelissózder júrgizip, saýda-ekonomikalyq ózara yqpaldastyq máselelerin talqylady. Qytai tarapy QR SIM-niń investitsiialardy tartý jáne eksportty jyljytýdy úilestirý jónindegi memlekettik saiasatty iske asyrý salasyndaǵy jańa fýnktsiialary men ókilettikterimen tanysty.
Qytai - Qazaqstannyń iri syrtqy saýda seriktesi. Sońǵy jyldary elder arasyndaǵy saýda kólemi aitarlyqtai artty. Osyǵan bailanysty saýda salasyn keńeitý, saýda qurylymyn ońtailandyrý, saýda aýqymyn ulǵaitý, sondai-aq ekijaqty saýdadaǵy joǵary tehnologiialyq ónimderdiń úlesin arttyrý máselelerin retteitin Qazaqstan men Qytai arasyndaǵy saýda qatynastaryn jandandyrý jónindegi Jol kartasyn ázirleý usynyldy.
Sapar aiasynda Ministr B. Atamqulov Beijińniń ortalyq parkindegi qazaqtyń birtýar aqyny Abai Qunanbaevtyń eskertkishine gúl shoqtaryn qoiyp, qytailyq músinshi Iýan Sikýndi «QR Táýelsizdigine 25 jyl» medalimen marapattaý rásimine qatysty.
