Qazaqstan Respýblikasy Premer-Ministriniń orynbasary – Syrtqy ister ministri Muhtar Tileýberdi Kýveitke alǵashqy resmi saparmen keldi. Sapar aiasynda syrtqy saiasi vedomstvosynyń basshysy Kýveit Syrtqy ister ministri sheih Ahmed Naser as-Sabahpen kelissózder júrgizdi, dep habarlaidy "Ult aqparat".
Taraptar Qazaqstan-Kýveit qatynastarynyń oń qarqynyn atap ótip, ekijaqty yntymaqtastyqtyń qazirgi jaǵdaiy men perspektivalaryn talqylady. Saýda-ekonomikalyq jáne investitsiialyq seriktestikti tereńdetýdiń mańyzdylyǵy atap ótildi.
Ózara tiimdi áriptestikti odan ári damytýdy qamtamasyz etýge baǵyttalǵan Qazaqstan-Kýveit úkimetaralyq komissiiasynyń jumysyn jandandyrýdyń mańyzdylyǵyna erekshe nazar aýdaryldy. Aǵymdaǵy jyldan bastap eki eldiń Syrtqy ister ministrleri osy komissiiaǵa birlesip tóraǵalyq etetin bolady.
Qazaqstan men Kýveit SIM basshylary kópjaqty yntymaqtastyq sheńberindegi ózara is-qimyldyń deńgeii men mazmunyna qanaǵattanǵandyqtaryn bildirdi. Óńirlik jáne halyqaralyq kún tártibindegi ózekti máseleler jóninde jan-jaqty pikir almasyldy.
Kelissózder qorytyndysy boiynsha Qazaqstan men Kýveit Syrtqy ister ministrleriniń Birlesken málimdeme qabyldandy.
Sapar aiasynda M.Tileýberdi Kýveit Premer-Ministri sheih Sabah as-Sabahpen kezdesip, QR Prezidenti Q. Toqaevtyń Kýveit Ámiri sheih Naýaf ál-Ahmed ál-Djaber as-Sabahqa ústimizdegi jyldyń qazan aiynda Nur-Sultan qalasynda ótetin AÓSShK VI sammitine qatysýǵa shaqyrýyn tabys etti.
Sondai-aq Qarjy ministri, Ekonomika jáne investitsiialar máseleleri jónindegi memlekettik ministr - Kuwait Investment Authority Táýelsiz qory Direktorlar keńesiniń tóraǵasy Abdýl-Ýahab ál-Rýsheidpen kelissózder ótti. M.Tileýberdi suhbattasyn «Astana» Halyqaralyq qarjy ortalyǵynyń qyzmetimen tanystyryp, Kýveit tarapyn AHQO-men yntymaqtastyqqa shaqyrdy.
QR Syrtqy ister ministri Alshaya Group Kýveittiń iri investitsiialyq holdinginiń basshysy Mohammed ál-Shaiamen kezdesti. Kýveittik biznesmen óz kompaniiasynyń Qazaqstannyń naryǵyna qatysýyn keńeitýge múddeliligin bildirdi. Qazirgi ýaqytta kompaniia QR-da Starbucks kofehanalar jelisin, Mothercare balalar kiim dúkenderin keńeitý, sondai-aq Victoria 's Secret, American Eagle, Claire' s jáne basqa da jańa halyqaralyq saýda brendterin tartý boiynsha josparlardy qarastyrýda.
