Qazaqstannyń Syrdariia ózeniniń basseininen alatyn sý úlesi 1982 jáne 1984 jylǵy qujattarmen retteledi, dep habarlaidy QazAqparat.
Qazaqstan Syrdariia ózeni arqyly jyl saiyn keminde 10 tekshe shaqyrym sý alyp otyrýy kerek.
Al sý mol jyldary bul meje 12 tekshe shaqyrymnan az bolmaýy tiis. Sonaý keńes zamanynda bekitilgen qujattarda bul shart anyq jazylǵan.
Ekologiia, geologiia jáne tabiǵi resrýstar ministrligi redaktsiia joldaǵan saýalǵa osyndai jaýap berdi.
«Keńestik Sotsialistik Respýblikalar Odaǵynyń memlekettik josparlaý komiteti memlekettik saraptaý komissiiasynyń 1982 jylǵy 5 mamyrdaǵy №11 qaýlysymen bektilgen «Memlekettik saraptaý komissiiasynyń saraptamalyq qorytyndysy» jáne KSRO Melioratsiia jáne sý sharýashylyǵy ministrligi ǵylymi-tehnikalyq keńesi otyrysynyń 1984 jylǵy 29 aqpandaǵy № 413 hattamasymen bekitilgen «Syrdariia ózeniniń basseinindegi sý resýrstaryn keshendi paidalaný men qorǵaýdyń naqtylanǵan shemasyna» sáikes Syrdariia ózeninen Qazaqstannyń úlesi - ortasha kópjyldyq mólsherde 12 km3, al sý az jyldary - 10 km3 dep belgilengen» dep jazylǵan jaýapta.
Ministrlik mamandarynyń aitýynsha, atalmysh qujattarda Sharadara sý qoimasyna deiingi tustarda Syrdariia basseininen Qazaqstanǵa kiretin sýdyń kólemi de naqtylanǵan eken.
«Sonymen qatar, Shardara sý qoimasyna deiin Syrdariia ózeninen Farhad sý torabynan Dostyq memleketaralyq kanaly boiynsha - 1,11 km3, al Shyrshyq ózeni, Úlken Keles magistraldyq kanaly, Zah, Hanym, Bozsý memleketaralyq kanaldary boiynsha-1,07 km3 úlesimiz bar» delingen vitse-ministr Serik Qojaniiazovtyń jaýabynda.
