Asqar Mamin Qazaqstannyń Premer-ministri bolyp taǵaiyndaldy, dep habarlaidy "Ult aqparat".
Parlament Májilisiniń jalpy otyrysyna qatysqan 99 depýtattyń 78-i Mamindi qoldap daýys berdi, 21 adam qalys qaldy.
Aita keteiik, jiynda Memleket basshysy Qasym-Jomart Toqaev Premer-ministr laýazymyna Asqar Mamindi usyndy. Májilis otyrysynda Prezident Úkimettiń pandemiia kezinde daǵdarysqa qarsy sharalardy der kezinde qabyldaǵanyn aitty.
"Qazir elimiz kúrdeli kezeńdi bastan ótkerýde. Búkil álem sońǵy jyldarda eshkim kútpegen daǵdarysqa tap boldy. Onyń saldary Qazaqstanǵa da áserin tigizdi. Biz Táýelsizdik jyldary áleýmettik-ekonomikalyq áleýetimizdi arttyryp, qiyndyqtardy eńserý úshin mol qor jinadyq. Sonyń arqasynda úkimet daǵdarysqa qarsy sharalardy der kezinde qabyldady. Olar buryn-sońdy bolmaǵan aýqymda júzege asyryldy", - dedi Memleket basshysy májilis otyrysynda.
Qazaqstanda 10 qańtarda Májilis depýtattaryn sailaý ótti. Parlamentke úsh partiia keldi:
Nur Otan partiiasy (71,09%)
"Aq jol"Qazaqstannyń demokratiialyq partiiasy (10,95%)
Qazaqstan halyq partiiasy (9,10%).
Eske sala keteiik, Elbasy Nursultan Nazarbaev ta osyǵan deiin «Nur Otan» partiiasy fraktsiiasynyń otyrysynda Úkimet basshysynyń kandidatýrasyna qatysty pikir bildirdi.
«Meniń oiymsha, sabaqtastyqty saqtaý kerek. Barlyq qiyndyqqa qaramastan, Úkimet óz jumysyn jaqsy atqardy. Basqa elderge qaraǵanda biz jaman nátije kórsetken joqpyz. Eger Prezident Asqar Uzaqbaiuly Mamindi usynsa, onda men fraktsiiadan onyń kandidatýrasyn qoldaýdy suraimyn», - dedi Nursultan Nazarbaev.
Asqar Uzaqbaiuly Mamin 1965 jyly Tselinograd qalasynda dúniege kelgen. Tselinograd injener qurylysy institýtyn, G. V. Plehanov atyndaǵy Resei ekonomikalyq akademiiasyn injener-qurylysshy, ekonomist mamandyǵy boiynsha támamdaǵan.
Eńbek jolyn «Tselintiajstroi» tresinde montajdaýshy bolyp bastaǵan. 1996–2008 jyldar aralyǵynda Astana qalasy ákiminiń birinshi orynbasary, kólik jáne kommýnikatsiialar vitse-ministri, indýstriia jáne saýda birinshi vitse-ministri, Qazaqstan Respýblikasy kólik jáne kommýnikatsiialar ministri, Astana qalasynyń ákimi qyzmetterin atqarǵan.
2008 jylǵy sáýirden bastap — «Qazaqstan temir joly» ulttyq kompaniiasy» aktsionerlik qoǵamynyń prezidenti. 2016 jylǵy 9 qyrkúiekten bastap — QR Premer-Ministriniń Birinshi Orynbasary. 2019 jylǵy 25 aqpannan bastap Qazaqstan Respýblikasy Prezidentiniń Jarlyǵymen QR Premer-Ministri bolyp taǵaiyndaldy.
«Eren eńbegi úshin» medalimen (1998), «Qurmet» ordenimen (2006), ekinshi dárejeli «Barys» ordenimen (2011), Áýlie kniaz Máskeýlik Daniildiń úshinshi deńgeili ordenimen (2010), Frantsýz Respýblikasynyń Qurmetti Legiony (2013) jáne Latviia Respýblikasynyń «Tanym kresti» ekinshi deńgeili ordenimen (2013), Ispaniia Koroldiginiń «Azamattyq eńbegi úshin» birinshi deńgeili ordenimen (2014) marapattalǵan. Astana qalasynyń qurmetti azamaty (2011), Qurmetti temirjolshy (2012), Qazaqstannyń qurmetti qurylysshysy (2013).
