Qazaqstan dostas Palestinanyń barlyq beibit umtylystaryna járdemdesetin bolady. Bul týraly Astanada Palestina Syrtqy ister ministri Riiad ál-Málkimen kezdesýden keiin QR Syrtqy ister ministri Qairat Ábdirahmanov málim etti, dep habarlaidy QazAqparat.
«Qazaqstan Palestinamen ekijaqty yntymaqtastyqty damytýǵa asa úlken mán beredi. Atalǵan yntymaqtastyqtyń negizin Qazaqstan óz táýelsizdigin jariialaǵan kezde 1991 jyly Palestinany azat etý uiymynyń, Palestina Ulttyq Ákimshiliginiń kóshbasshysy marqum Ia.Arafattyń Qazaqstanǵa, sondai-aq Elbasymyz N.Nazarbaevtyń 1995 jyly Palestinaǵa barǵan saparlarynda qalady. Biyl eki el arasynda diplomatiialyq qarym-qatynastardyń ornatylǵanyna 26 jyl toldy. Osy ýaqyt ishinde elderimiz arasyndaǵy ekijaqty qarym-qatynastarmen birge, BUU, IYU jáne basqa da halyqaralyq uiymdar aiasynda kópjaqty yntymaqtastyǵymyz dami tústi», - dep toqtaldy Q. Ábdirahmanov.
Sonymen qatar ministr Palestina halyqaralyq uiymdar sheńberinde Qazaqstannyń negizgi halyqaralyq bastamalaryn turaqty túrde qoldap kele jatqanyn atap ótti.
«Qazaqstan Respýblikasy Palestina problemasynyń rettelýi Taiaý Shyǵys óńirinde uzaq merzimdi beibitshilik pen turaqtylyqty ornatýdyń negizgi sharty bolyp tabylatynyna senim arta otyryp, Palestinany táýelsiz memleket retinde moiyndap, halyqaralyq qaýymdasyqtyń tolyqqandy múshesi bolýyn dáiekti túrde jaqtaidy. Qazaqstannyń atalǵan máselege orai ustanymy ózgerissiz qalady.Palestindik-izraildik janjaldyń sheshimi 1967 jylǵy shekaralarda astanasy Shyǵys Ierýsalim bolyp tabylatyn Palestina memleketiniń qurylýyn kózdeitin «eki halyqqa eki memleket» qaǵidasy boiynsha iske asýy tiis. Túrli qiyndyqtarǵa qaramastan, kelissózder protsesi ári qarai jalǵasýy kerek», - dep naqtylady QR SIM basshysy.
Onyń sózine qaraǵanda, Qazaqstan BUU Qaýipsizdik keńesiniń turaqty emes múshesi retinde Taiaý Shyǵysta beibitshilikti ornatýdyń ajyramas sharty bolyp tabylatyn óńirdegi turaqtylyqty qalpyna keltirý protsesine tolyq qoldaýyn kórsetýdi jalǵastyrady. Sondai-aq dostas Palestinanyń barlyq beibit umtylystaryn árdaiym qoldap, barynsha járdemdesetin bolady.
Budan buryn habarlanǵandai, Palestina memleketiniń Syrtqy ister jáne ekspatrianttar ministri Riiad ál-Málkiniń Qazaqstan Respýblikasyna sapary aiasynda eki qujatqa qol qoiyldy.
