Sońǵy bes jylda Qazaqstannyń memlekettik qaryzy tórt ese ósti. Finprom.kz sarapshylary osyndai tujyrymǵa keldi, dep jazady Sputnik.
Búgingi kúni Qazaqstannyń memlekettik qaryzy 14,8 trillion teńgege (shamamen 42 milliard dollar) teń, dep jazylǵan biznes jáne qarjy saitynda. Ótken jyly jiyntyq memlekettik qaryz 21,9% —ǵa az bolǵan.
Qazaqstannyń memlekettik qaryzy degenimiz ne?
Eldiń jalpy memlekettik qaryzy úsh komponentten turady:
- memlekettik qaryz – 14,2 trillion teńge (39 milliard dollar)
- memleket kepildendirgen qaryz – 523 milliard teńge (1,5 milliard dollar)
- memlekettik kepildikter boiynsha ishki qaryz – 37,8 milliard teńge (105 million dollar)
Sarapshylardyń pikirinshe, Qazaqstannyń memlekettik qaryzy kóbine úkimettiń ishki qaryzy esebinen ósti. Bir jyl ishinde ol 30,6%-ǵa, iaǵni 4,4-ten 5,8 trillion teńgege deiin artty.
Syrtqy qaryz 4,7%-ǵa nemese 210 milliard teńgege (585 million dollarǵa) ósti.
Ortasha alǵanda memlekettik qaryz kólemi jyldan jylǵa 28,8-ǵa artyp keledi, dep túiindedi Finprom.
Osy jyldyń birinshi jartysynda memlekettik biýdjetten qaryzǵa qyzmet kórsetý úshin 248,7 milliard teńge (shamamen 700 million dollar) bólindi. Bul 2017 jyldyń sáikes kezeńimen salystyrǵanda 13,3%-ǵa artyq.
Sonymen qatar barlyq baǵyt boiynsha memlekettik biýdjettiń jalpy shyǵyny 9,6% nemese 449,1 milliard teńgege (1,2 milliard AQSh dollary) kóbeidi.
