Qazaqstannyń mashina jasaý ónerkásibi sońǵy 10 jylda óndiris kólemin 4 ese arttyrdy. Bul týraly Qazaqstan mashina jasaýshylarynyń VIII forýmynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Memlekettik indýstriialyq baǵdarlamany iske asyrý nátijesinde mashina jasaý óńdeý ónerkásibi ósiminiń draiverine ainaldy. Sońǵy 10 jylda saladaǵy óndiris kólemi 4 ese, investitsiialar 2,5 ese, eksport kólemi 3 ese derlik ósip, 1,1 mlrd AQSh dollaryn qurady. 2018 jyldyń qorytyndysy boiynsha jyldyq óndiris kólemi alǵash ret 1 trln teńge jáne sala óńdeý ónerkásibiniń iri salasy – metallýrgiiamen bir qatarǵa turdy», - dedi ministr.
Onyń dereginshe, 2019 jyldyń qorytyndysy boiynsha saladaǵy óndiris kólemi 1 trln 472 mlrd teńge boldy. Al 2020 jyldyń 8 aiynda saladaǵy óndiris kólemi 16,3 paiyzǵa ósti. Salanyń 3 myń kásipornynda shamamen 123 myń adam eńbek etedi.
«Memleket pen biznestiń birlesken kúsh-jigeriniń arqasynda salada shamamen 367 mlrd teńge somaǵa 128 joba sátti úzege asyrylyp, 16 myńǵa jýyq jumys orny quryldy. Eńbek ónimdiligi 9,2 myń dollardan 15,5 myń dollarǵa deiin ósti. Eksportqa shyǵarylatyn ónim ataýy keńeitildi. Qazir bizdiń mashina jasaý kásiporyndarymyz Resei, qytai, Ázerbaijan, Tájikstan, BAÁ, Túrikmenstan syndy elderge ónimderin eksportqa shyǵarady. Lokomotivter, júk jáne jolaýshylar vagony, temir jol dóńgelekteri men bilikter, akkýmýliatorlardyń jańa túrleri, sorǵyshtar syndy mashina jasaý ónimderiniń jańa túrleri shyǵaryla bastady»,- dedi Beibit Atamqulov.
