قازاقستاننىڭ ماشينا جاساۋ ٶنەركەسٸبٸ سوڭعى 10 جىلدا ٶندٸرٸس كٶلەمٸن 4 ەسە ارتتىردى. بۇل تۋرالى قازاقستان ماشينا جاساۋشىلارىنىڭ VIII فورۋمىندا قر يندۋسترييا جەنە ينفراقۇرىلىمدىق دامۋ مينيسترٸ بەيبٸت اتامقۇلوۆ ايتتى, دەپ حابارلايدى قازاقپارات.
«مەملەكەتتٸك يندۋسترييالىق باعدارلامانى ٸسكە اسىرۋ نەتيجەسٸندە ماشينا جاساۋ ٶڭدەۋ ٶنەركەسٸبٸ ٶسٸمٸنٸڭ درايۆەرٸنە اينالدى. سوڭعى 10 جىلدا سالاداعى ٶندٸرٸس كٶلەمٸ 4 ەسە, ينۆەستيتسييالار 2,5 ەسە, ەكسپورت كٶلەمٸ 3 ەسە دەرلٸك ٶسٸپ, 1,1 ملرد اقش دوللارىن قۇرادى. 2018 جىلدىڭ قورىتىندىسى بويىنشا جىلدىق ٶندٸرٸس كٶلەمٸ العاش رەت 1 ترلن تەڭگە جەنە سالا ٶڭدەۋ ٶنەركەسٸبٸنٸڭ ٸرٸ سالاسى – مەتاللۋرگييامەن بٸر قاتارعا تۇردى», - دەدٸ مينيستر.
ونىڭ دەرەگٸنشە, 2019 جىلدىڭ قورىتىندىسى بويىنشا سالاداعى ٶندٸرٸس كٶلەمٸ 1 ترلن 472 ملرد تەڭگە بولدى. ال 2020 جىلدىڭ 8 ايىندا سالاداعى ٶندٸرٸس كٶلەمٸ 16,3 پايىزعا ٶستٸ. سالانىڭ 3 مىڭ كەسٸپورنىندا شامامەن 123 مىڭ ادام ەڭبەك ەتەدٸ.
«مەملەكەت پەن بيزنەستٸڭ بٸرلەسكەن كٷش-جٸگەرٸنٸڭ ارقاسىندا سالادا شامامەن 367 ملرد تەڭگە سوماعا 128 جوبا سەتتٸ ٷزەگە اسىرىلىپ, 16 مىڭعا جۋىق جۇمىس ورنى قۇرىلدى. ەڭبەك ٶنٸمدٸلٸگٸ 9,2 مىڭ دوللاردان 15,5 مىڭ دوللارعا دەيٸن ٶستٸ. ەكسپورتقا شىعارىلاتىن ٶنٸم اتاۋى كەڭەيتٸلدٸ. قازٸر بٸزدٸڭ ماشينا جاساۋ كەسٸپورىندارىمىز رەسەي, قىتاي, ەزەربايجان, تەجٸكستان, باە, تٷرٸكمەنستان سىندى ەلدەرگە ٶنٸمدەرٸن ەكسپورتقا شىعارادى. لوكوموتيۆتەر, جٷك جەنە جولاۋشىلار ۆاگونى, تەمٸر جول دٶڭگەلەكتەرٸ مەن بٸلٸكتەر, اككۋمۋلياتورلاردىڭ جاڭا تٷرلەرٸ, سورعىشتار سىندى ماشينا جاساۋ ٶنٸمدەرٸنٸڭ جاڭا تٷرلەرٸ شىعارىلا باستادى»,- دەدٸ بەيبٸت اتامقۇلوۆ.
