Qazaqstannyń Qytaimen saýda ainalymy bir jylda birden 13% artty. Alaida eksporttyq jetkizilimder ótken jylǵy kórsetkishterge áli jete qoiǵan joq. Shekaradaǵy ahýal aqyryndap qalpyna kelýde, dep habarlaidy QazAqparat finprom.kz saityna silteme jasap.
Osy jyldyń úsh toqsanynyń qorytyndysy boiynsha Qazaqstannyń Qytaimen taýar ainalymy 13,5 mlrd AQSh dollaryn qurady. Al AQSh-pen saýda ainalymy - bir jyl burynǵyǵa qaraǵanda 12,5% artqan. Onyń ishinde eksport 1,3%, 7,3 mlrd AQSh dollaryna deiin ósip, import, kerisinshe, 34,7%, 6,2 mlrd AQSh dollaryna azaiǵan.
Qytai Qazaqstan taýar ainalymynyń 18,5% qurap otyr, eksport qurylymynda — 16,8%, import qurylymynda - 21%.
Jyl basynan beri Qazaqstan Qytaiǵa 163,2 myń tonna bidai, 90,4 myń tonna arpa, 4 mln tonna temir kenin, 44,3 myń tonna marganets kenin, 37,1 mln tonna myrysh kenin, 85,1 myń tonna kómir, 2,5 mln tonna shiki munai, 5,3 mlrd tekshe metr tabiǵi gaz, 3,7 myń tonna jún, 529,8 myń tonna ferroqorytpa, 28,1 myń tonna janýar nemese ósimdik tektes mailardy, 8,7 myń tonna toqyma buiymdaryn jáne t.b. jibergen.
Sonymen qatar, Qazaqstan Qytaidan 531 tonna konditerlik ónim, 1,3 myń tonna dári-dármek, 9,5 myń tonna gigienalyq jáne kosmetikalyq qural, 1,7 mln shina men dońǵalaq tysyn, 10,6 myń tonna qaǵaz, karton jáne tselliýloza maqtasyn, 77,5 myń sharshy metr linoleým, 46,5 myń tonna trikotaj kiimin, 2,5 myń tonna radiator, 1,9 myń tonna ishten janý qozǵaltqyshyn, 9,7 myń tonna aýa nemese vakýýmdyq sorǵylar, 9,6 myń tonna tońazytqysh pen muzdatqysh, 1,7 myń tonna telefon apparatyn, 303,6 myń monitor men proektor jáne t. b. ákelgen.
Qazaqstan júkterin qabyldaý jáne jóneltý boiynsha Qytai engizgen shekteýlerge bailanysty jaǵdai birtindep sheshilýde.
