Tabiǵi monopoliialardy retteý komiteti (TMRK) baǵalardy saraptaý nátijesinde Qazaqstan óńirleriniń basym bóliginde gaz baǵasyn tómendetti, - dep habarlaidy Tengrinews.kz tilshisi.
Tabiǵi monopoliialardy retteý komiteti barlyq gazdandyrylǵan óńirdegi "QazTransGaz Aimaq" AQ tutynýshylary úshin gaz baǵasyna saraptama júrgizýge bastama jasaǵanyn habarlady. 2021 jylǵy qyrkúiektiń aiaǵynda tariftik organnyń suraýy boiynsha "QazTransGaz Aimaq" AQ saraptamaǵa qajetti qujattardy tapsyrǵan.
TMRK baǵa saraptamasynyń qorytyndysy boiynsha "QazTransGaz Aimaq" AQ-tyń jetkizý ústemeaqysyn elimizdiń barlyq gazdandyrylǵan óńirinde 15 paiyzdan (Shyǵys Qazaqstan oblysy) 50,63 paiyzǵa (Atyraý oblysy) tómendetken.
Komitet málimetinshe, tutynýshylar úshin gazdyń baǵasy 70-80 paiyzǵa Energetika ministrligi bekitetin kóterme baǵaǵa bailanysty, al tabiǵi gaz baǵasynyń qalǵan bóligi tasymaldaý qyzmetteri men TMRK retteitin gazdy ótkizý shyǵyndarynan turady.
Jabdyqtaý ústemesin tómendetý jumystary nátijesinde komitet tutynýshylar úshin taýarlyq gazdyń túpkilikti shekti baǵalaryn 0,34-ten 38,96 paiyzǵa deiin tómendetken.
Tómendetilgen baǵalar 2022 jyldyń 1 aqpanynan bastap kúshine enedi.
