HeadHunter internet-servisi Qazaqstannyń qai qalalary eń kóp jalaqy tóleitinin jáne qazirgi tańdaǵy asa suranysqa ie mamandyqtardy atady, dep habarlaidy "Ult aqparat".
Osy jyldyń qańtar-qyrkúiegi aralyǵyndaǵy málimetterge jasalǵan taldaýdyń nátijesi boiynsha, bos jumys oryndaryn usynatyn belsendi óńirlerdiń qataryna Almaty (43,29%), Nur-Sultan (20,37%), Qaraǵandy (5,98%), Atyraý (5,66%) jáne Shymkent (4,07%) qalalary endi.
Jumys berýshiler kelesidei salalarda vakansiialardy jii ornalastyrady: saýda-sattyq (25,16%), býhgalteriia, basqarýshylyq esep-qisap, kásiporyndardyń qarjysy (11,60%), ákimshilik personal, bankter, investitsiialar, lizing (9,15%), aqparattyq tehnologiialar, ǵalamtor, telekom (9,04%).
HeadHunter indeksine sáikes, Nur-Sultan, Almaty, Atyraý, Petropavl, Pavlodar, Óskemen, Qostanai, Qaraǵandy qalalarynda bir bos jumys ornyna 4 úmitkerden keledi. Bul, eńbek naryǵynyń qalypty jaǵdaiyn kórsetedi.
Oral, Taldyqorǵan, Shymkent, Túrkistan, Kókshetaý qalalarynda bir vakansiiaǵa 4-6 túiindeme jiberiledi. Bul, eńbek naryǵy jaǵdaiynyń kúrdeliligin bildiredi. Al Aqtóbe, Aqtaý, Taraz jáne Qyzylorda qalalarynda jumys izdeýshiler arasynda básekelestik deńgeii joǵary.
Sondai-aq internet-servis ailyq eńbekaqy boiynsha málimetterdi usyndy.
Qazaqstan batysyndaǵy qalalar jalaqy mólsheri jaǵynan aldyńǵy qatarda tur. 2 mln teńge kólemindegi joǵary jalaqyny Atyraýdyń jumys berýshileri usynady. Sondai-aq, qomaqty eńbekaqy tóleitin qalalardyń qatarynda Aqtaý, Aqtóbe, Almaty, Nur-Sultan bar.
Al Taraz, Túrkistan, Shymkent shaharlary kesteniń eń sońǵy ornynda ornalasqan. Mundaǵy eń joǵary jalaqy mólsheri 500-540 myń teńgeni quraidy.
