Ulttyq taýar taratýshy júiesin qurý – Eýraziialyq azyq-túlik habynyń basty infraqurylymy bolady. OKQ-da ótken baspasóz máslihatynda Saýda jáne integratsiia ministri Baqyt Sultanov osylai dedi, dep habarlaidy QazAqparat.
Baspasóz máslihatynda ministr Memleket basshysynyń Joldaýyn júzege asyrý aiasynda Ulttyq taýar ótkizýshi júie qurylatynyn jetkizdi. Ol júie EAEO men Ortalyq Aziia aimaǵyndaǵy elderdiń dál sondai júielerimen integratsiialanady.
«Bul júie Qazaqstandaǵy 24 kóterme-taratý ortalyǵynan turady. Olar fermerlik ónimderdi saqtaý men qaita taratýdyń tolyqqandy ári keshendi qyzmetterin kórsetedi», - dedi Baqyt Sultanov.
Ministrdiń aitýynsha mundai ortalyqtardyń salynýy kóptegen sharýashylyqtardyń, jeke sharýa qojalyqtardyń ónimdi óndirip, satý kezinde kúshin biriktiredi.
«Jalpy Ulttyq taýar taratýshy júieni qurý fermerlerdi, satyp alýshylardy, kólik ieleri men satýshylardy, tutynýshylardy bir keshenge biriktiretin zákirli infraqurylym bolmaq», - dedi ol.
Joba qazirdiń ózinde júzege asý satysynda tur. Atalǵan ortalyqtar Pavlodar oblysynyń Aqsý qalasyndaǵy Michýrino aýylynda, Almaty oblysynyń Qapshaǵai qalasynda, Jambyl oblysynyń Shý qalasynda, sonymen qatar Nur-Sultan, Almaty jáne Shymkent qalalarynda salynady.
«Osy jyldyń sońyna deiin jeke investorlardy tarta otyryp, 17 kóterme-taratý ortalyǵy boiynsha jumys júrgizemiz», - dedi Baqyt Sultanov.
