Foto: istockphoto.com
Qazaqstannyń Ishki ister ministrligi mektep baǵdarlamasyna jol qozǵalysy erejelerin oqytatyn jeke mindetti pán engizýdi usyndy. Bul týraly Ortalyq kommýnikatsiialar qyzmetinde ótken brifingte IIM Ákimshilik politsiia komitetiniń tóraǵasy Qaisar Sultanbaev málimdedi, dep habarlaidy Ult.kz.
Onyń aitýynsha, arnaiy sabaqtar balalarǵa jolda zańǵa baǵyný mádenietin qalyptastyrýǵa kómektesedi, ári er jetip, kólik júrgize bastaǵanda jol qaýipsizdigine oń yqpal etedi.
Balalardyń jol kólik jaraqatynyń aldyn alýda eń myqty quraldardyń biri – jas jol inspektorlar jasaǵynyń qyzmetin uiymdastyrý ekenin aitty.
"Álemniń kóptegen elinde mektep oqýshylaryn jol qozǵalysy qaýipsizdigine tartý ideiasy bilim berý men qoǵamdyq mádeniettiń bir bóligine ainalǵan. Halyqaralyq tájiribe mundai bastamalardyń jol-kólik jaraqattaryn azaityp, óskeleń urpaqta azamattyq jaýapkershilik sezimin qalyptastyratynyn kórsetedi", – dedi Sultanbaev.
1 qyrkúiek qarsańynda Ishki ister ministrligi ata-analar men muǵalimderdi politseilermen birlesip, ár oqýshynyń úiden mektepke jáne keri qarai júretin eń qaýipsiz jolyn aldyn ala belgileýge shaqyrdy.
«Bala mektepke de, úige de árdaiym bir ǵana eń qaýipsiz baǵytpen qatynaýy tiis, ony jatqa bilýi qajet», – dedi ol.
Kámeletke tolmaǵandardyń kinásinen bolǵan jol apattarynda 17 bala qaitys bolyp, 200-den astamy ár túrli dene jaraqatyn alǵan.
Jaiaý-júrginshi balalardyń qatysýymen bolatyn jol apattarynyń negizgi sebepteri - joldy kez-kelgen jerden ótý, baǵdarshamnyń qyzyl túsine ótip ketý jáne jaqyndap qalǵan kóliktiń aldynan júgirip shyǵý.
