Qazaqstanda un baǵasy bir aida 8 paiyzǵa qymbattady, dep habarlaidy QazAqparat energyprom.kz saityna silteme jasap.
2022 jyldyń qańtar-sáýir ailarynda elimizde dándi daqyldardan 1,2 mln tonna un óndirigen. Bul ótken jylmen salystyrǵanda 4,6% artyq. Óńirler ishinde dástúrli túrde eń kóp un Qostanai oblysynda óndirildi. Onda 399,9 myń tonna, jyldyq ósim 10,8%-dy quraǵan. Úzdik úshtikke sondai-aq Soltústik Qazaqstan (118 myń tonna, jyldyq ósim 25,2%) jáne Qaraǵandy (96,2 myń tonna, -4,4%) oblystary kirdi.
Jalpy, 2021 jyldyń qańtar-jeltoqsanynda óndiris 6,9%-ǵa, 3,1 mln tonnaǵa deiin tómendedi. Qazaqstan el ishindegi qajettilikterin tolyǵymen qamtamasyz etýde. Osylaisha, birinshi toqsannyń qorytyndysy boiynsha jergilikti kompaniialar suranysty (ishki naryqtaǵy satýdy qosqanda eksportty) 99,5%-ǵa qamtamasyz etti. Jalpy import 23,9%-ǵa ósken, biraq bul osy kezeńdeg elde óndirilgen 4,1 myń tonna ǵana. Al, 467,8 myń tonna un eksporttaldy. Bul ótken jylmen salystyrǵanda 36,4 paiyz artyq. Eksporttyń úlesi resýrstardyń 56,2%-yn qurady.
2022 jyldyń qańtar-naýryz ailarynda un eksporty bir jylda birden 78,2%-ǵa ósip, 172,8 mln AQSh dollaryn qurady. TMD elderine 126 myń tonna un jóneltilgen. Bul ótken jylmen salystyrǵanda 23,8% artyq. Munda el óniminiń negizgi importtaýshysy – Ózbekstan. Úzdik «úshtikke» sondai-aq Túrikmenstan jáne Resei kirdi. TMD-dan tys elderge 132,4 mln AQSh dollary somasyna 341,9 myń tonna un jóneltilgen. Munda negizgi kólemdi Aýǵanstan importtaidy.
