Qazaqstannyń birinshi, álemniń 19-raketkasy Elena Rybakina Aýstriiadaǵy Lints WTA týrnirine qatysady, dep habarlaidy "Ult aqparat".
Jarystyń Tvitterdegi paraqshasynda oǵan qatysýshylardyń tizimi jariialandy.
Olardyń ishinde E.Rybakinamen qatar Belarýs ókili Arina Sobolenko, chehiialyq Marketa Vondroýshova, belgiialyq Elise Mertens, estoniialyq Anett Kontaveit, amerikalyq Djennifer Breidi, ýkrainalyq Daiana Iastremskaia, reseilik Ekaterina Aleksandrova jáne basqa tennisshiler bar.
Biyl atalmysh doda 11-18 qazan aralyǵynda ótýi tiis edi. Áitse de koronavirýs indetine bailanysty 7-15 qarashaǵa qaldyryldy.
Ótken jyly finalda latviialyq Elena Ostapenkony 6:3, 1:6, 6:2 esebimen jeńgen amerikalyq Kori Gaýff chempion atanǵan bolatyn.
Eske sala keteiik, budan buryn Elena Rybakinanyń Chehiiadaǵy týrnirde utylyp qalǵanyn, Dmitrii Popkonyń Ystanbul dodasynyń shirek finalyna shyqqanyn jazǵan bolatynbyz.
Búgin D.Popko Belarýs tennisshisi Ilia Ivashkodan 4:6, 0:6 esebimen utylyp, jartylai finalǵa shyǵa almai qaldy.
Sol sekildi qazaqstandyqtar Gózal Ainitdinova men Jibek Qulambaeva juptyq synda Mysyrdyń Sharm ál-Sheih qalasynda ITF týrnirinde birshama sátti óner kórsetti. Tipti jarystyń 1-raketkalary, reseilikter Anastasiia Gasanova men Anna Morginany 6:0, 6:0 esebimen oisyrata utyp, jartylai finalǵa shyqty. Alaida búgin reseilikter Veronika Pepeliaeva men Anastasiia Tihonovamen tartysty matchta 6:3, 3:6, 8:10 esebimen jol berip, finaldyq básekeden tys qaldy.
