Memleket basshysy Qazaqstannyń Bas múftii Serikbai qajy Orazdy qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Nursultan Nazarbaev Serikbai qajy Orazdy Qazaqstannyń Bas múftii laýazymyna sailanýymen quttyqtady.
– Men Táýelsizdik kúni qarsańynda Sizdi osyndai joǵary laýazymǵa sailanýyńyzben quttyqtaý úshin shaqyrdym. Táýelsizdiktiń arqasynda dástúrimizdi qaita jańǵyrtyp, ata-babamyzdyń dinin ustaný múmkindigine ie boldyq. Memleket tarapynan kez kelgen azamattyń dini bostandyǵyn qamtamasyz etý úshin barlyq jaǵdai jasaldy, – dedi Qazaqstan Prezidenti.
Elbasy Din isteri jáne azamattyq qoǵam ministrligi arqyly dini qatynastar salasyn retteýde memleket erekshe ról atqaratynyn aitty.
– Qazaqstan – zaiyrly memleket. Ministrlik dinge qandai da bir shekteý qoiý úshin qurylǵan joq. Ministrlik din salasynda tártip ornatyp, din jolyndaǵy adamdar bir-biriniń quqyǵyn buzbaýyn qamtamasyz etý úshin qurylǵan, – dedi Memleket basshysy.
Sondai-aq, Nursultan Nazarbaev ázirlenip jatqan dini qyzmet týraly zańnyń negizgi erejelerin keń aýqymda túsindirip, halyqqa jetkizý jóninde birlese jumys júrgizýdiń qajettigine nazar aýdardy.
Budan bólek, Memleket basshysy Qazaqstan musylmandary dini basqarmasynyń ókilderimen biylǵy sáýirdegi kezdesýine toqtalyp, onda sanany jańǵyrtyp, elimizdiń tarihi jáne rýhani bailyǵyn saqtaý qajettigi talqylanǵanyn atap ótti.
– Patriotrizm, otandy súiý, elimizdegi jáne óńirdegi turaqtylyq – bizdiń bolashaǵymyzdyń kepili. Sol úshin biz birlese jumys isteýimiz kerek, – dedi Elbasy.
Nursultan Nazarbaev Qazaqstan musylmandary úshin hanafi mazhabynyń dástúrli sipatyna nazar aýdaryp, bul aǵymnyń mánin uǵyndyrý qajettigin aitty.
– Din jolyndaǵy adamdardyń arasynda jastar da bar. Meshitterge sán úshin baratyndar da bar, shalbarynyń balaqtaryn qysqartyp, saqal qoiǵan dindarlar da bar. Solardyń bárine islam dininiń negizin túsindirý kerek, – dedi Qazaqstan Prezidenti.
Sondai-aq, Memleket basshysy radikaldy dini aǵymdardy ustanýshylarmen arnaiy túsindirý jumystaryn júrgizý qajettigine nazar aýdardy.
– Dástúrli hanafi mazhabynyń qaǵidalaryn jáne onyń teris piǵyldy dini aǵymdardan aiyrmashylyǵyn túsindirý úshin Quran men hadisterdi biletin bilikti imamdardy tartý qajet, – dedi Memleket basshysy.
Sonymen qatar Elbasy muqtaj jandarǵa áleýmettik kómek kórsetý úshin ǵana emes, sondai-aq ǵylymi zertteýler men konferentsiialar ótkizip, aqparattyq-túsindirý jumystaryn júrgizý úshin de metsenattyqty damytýdyń mańyzdylyǵyn atap ótti.
Qazaqstannyń Bas múftii jyly qabyldaǵany úshin Memleket basshysyna alǵys aitty.
– Qazaqstan musylmandary dini basqarmasynyń aldynda tarihi turǵydan qalyptasqan dástúrli dini mektepti qaita jańǵyrtýǵa bailanysty úlken mindetter tur, – dedi Serikbai qajy Oraz.
– Siz «Bolashaqqa baǵdar: rýhani jańǵyrý» atty maqalańyzda jańa úrdister men álemdegi ózgeristerge bet burý qajettigi týraly aittyńyz. Búginde bizdiń imamdar jańa ádebietterdi zerttep, ýaǵyz aitý men minajat etý barysynda osy bilimderin qoldanýda, – dedi Bas múfti.
Kezdesý sońynda Nursultan Nazarbaev pen Serikbai qajy Oraz elimizdegi dini bilim berý máselesin talqylady.
.jpeg)