PTR test anyqtamasy joq shetel azamattarynyń VAK sheshimi boiynsha Qazaqstanǵa kire almai, deportatsiialanatyny belgili. Al endeshe nelikten Qazaqstannyń áýejailarynda PTR test ótkizetin pýnktter ashylmaidy? Bul suraqqa Kóliktegi bas memlekettik sanitarlyq dáriger Sádýaqas Baiǵabylov jaýap berdi, dep habarlaidy QazAqparat.
«Eger Qazaqstanǵa ushyp kelgen shetel azamatynan koronavirýs anyqtalǵan jaǵdaida: birinshiden sheteldik 6-8 saǵat bola alatyndai áýejaida arnaiy oryn joq. Tiisinshe ol Qazaqstan arqyly basqa memleketke ushýdy oilaýy múmkin. Al eger odan Qazaqstanǵa ushyp kelgen ýaqytta koronavirýs anyqtalsa ony mindetti túrde aýrýhanaǵa jatqyzý kerek. Tiisinshe munyń arty kóp suraqty týyndatyp jiberedi. Odan da shetel azamatyna PTR testiniń teris nátijesimen kelip, osyndaǵy barlyq máselesin sheship, qaita ushyp ketkeni abzal», - dedi Sádýaqas Baiǵabylov OKQ-da ótken baspasóz máslihatynda.
Eske sala ketsek búgin QR Úkimetiniń baspasóz qyzmeti vedomstvoaralyq komissiianyń áýe kompaniialaryna PTR testi nátijesi týraly anyqtamasy joq jolaýshylardy ushaqqa otyrǵyzýǵa tyiym salý týraly sheshimin túsindirgen bolatyn.
Bul talap tek sheteldik azamattarǵa qatysty. Shetelde júrgen QR azamattarynyń áýe reisterimen PTR testileýden ótkeni týraly anyqtamasynsyz otanyna oralýǵa quqyǵy bar. Mundai jaǵdaida Qazaqstanǵa kelgennen keiin qazaqstandyqtar PTR testileý nátijesin alǵanǵa deiin karantinge ornalastyrylatyn bolady.
QR óńirleri arasyndaǵy ishki áýe reisteriniń ushaǵyna otyrǵyzý kezinde PTR test nátijesi týraly anyqtama talap etilmeidi.
