پتر تەست انىقتاماسى جوق شەتەل ازاماتتارىنىڭ ۆاك شەشٸمٸ بويىنشا قازاقستانعا كٸرە الماي, دەپورتاتسييالاناتىنى بەلگٸلٸ. ال ەندەشە نەلٸكتەن قازاقستاننىڭ ەۋەجايلارىندا پتر تەست ٶتكٸزەتٸن پۋنكتتەر اشىلمايدى? بۇل سۇراققا كٶلٸكتەگٸ باس مەملەكەتتٸك سانيتارلىق دەرٸگەر سەدۋاقاس بايعابىلوۆ جاۋاپ بەردٸ, دەپ حابارلايدى قازاقپارات.
«ەگەر قازاقستانعا ۇشىپ كەلگەن شەتەل ازاماتىنان كوروناۆيرۋس انىقتالعان جاعدايدا: بٸرٸنشٸدەن شەتەلدٸك 6-8 ساعات بولا الاتىنداي ەۋەجايدا ارنايى ورىن جوق. تيٸسٸنشە ول قازاقستان ارقىلى باسقا مەملەكەتكە ۇشۋدى ويلاۋى مٷمكٸن. ال ەگەر ودان قازاقستانعا ۇشىپ كەلگەن ۋاقىتتا كوروناۆيرۋس انىقتالسا ونى مٸندەتتٸ تٷردە اۋرۋحاناعا جاتقىزۋ كەرەك. تيٸسٸنشە مۇنىڭ ارتى كٶپ سۇراقتى تۋىنداتىپ جٸبەرەدٸ. ودان دا شەتەل ازاماتىنا پتر تەستٸنٸڭ تەرٸس نەتيجەسٸمەن كەلٸپ, وسىنداعى بارلىق مەسەلەسٸن شەشٸپ, قايتا ۇشىپ كەتكەنٸ ابزال», - دەدٸ سەدۋاقاس بايعابىلوۆ وكق-دا ٶتكەن باسپاسٶز مەسليحاتىندا.
ەسكە سالا كەتسەك بٷگٸن قر ٷكٸمەتٸنٸڭ باسپاسٶز قىزمەتٸ ۆەدومستۆوارالىق كوميسسييانىڭ ەۋە كومپانييالارىنا پتر تەستٸ نەتيجەسٸ تۋرالى انىقتاماسى جوق جولاۋشىلاردى ۇشاققا وتىرعىزۋعا تىيىم سالۋ تۋرالى شەشٸمٸن تٷسٸندٸرگەن بولاتىن.
بۇل تالاپ تەك شەتەلدٸك ازاماتتارعا قاتىستى. شەتەلدە جٷرگەن قر ازاماتتارىنىڭ ەۋە رەيستەرٸمەن پتر تەستٸلەۋدەن ٶتكەنٸ تۋرالى انىقتاماسىنسىز وتانىنا ورالۋعا قۇقىعى بار. مۇنداي جاعدايدا قازاقستانعا كەلگەننەن كەيٸن قازاقستاندىقتار پتر تەستٸلەۋ نەتيجەسٸن العانعا دەيٸن كارانتينگە ورنالاستىرىلاتىن بولادى.
قر ٶڭٸرلەرٸ اراسىنداعى ٸشكٸ ەۋە رەيستەرٸنٸڭ ۇشاعىنا وتىرعىزۋ كەزٸندە پتر تەست نەتيجەسٸ تۋرالى انىقتاما تالاپ ەتٸلمەيدٸ.
