.jpeg)
Qazaqstannyń Qorǵanys ministrliginde áskeri meditsinalyq bólimshelerdi zamanaýi meditsinalyq tehnikamen jáne kásibi kadrlarmen jabdyqtaý máseleleri turaqty túrde sheshilýde. Sonymen qatar áskeri medikterdiń qyzmeti jeke quramnyń jaýyngerlik qabiletin qoldaýǵa jáne olardyń densaýlyǵyn qalpyna keltirýge baǵyttalǵan. Bul jaily bas áskeri meditsinalyq basqarma bastyǵynyń orynbasary, emdeý profilaktika basqarmasynyń bastyǵy, meditsina qyzmetiniń polkovnigi Berik Iliiasov aityp berdi, – dep habarlaidy «Ult aqparat».
Aldymen «Áskeri meditsina qazirgi zamanǵy standarttar men talaptarǵa qanshalyqty sai?», «Áskeri meditsinalyq mekemelerdiń tehnikamen jáne apparatýramen jabdyqtalý deńgeii qandai?», «Búgingi tańda Qazaqstan qarýly kúshteriniń meditsinalyq resýrstary qandai?» degen suraqtarǵa jaýap bergen meditsina qyzmetiniń polkovnigi áskeri meditsina áli de jasalý ústinde ekenin tilge tiek etti.
«Ózderińizge málim, qazirgi kezde áskeri meditsina jalpy densaýlyq saqtaý júiesi retinde málim. Sondyqtan standarttar, talaptar jalpy densaýlyq saqtaý júiesine qoiylatyn, ol áskeri meditsinaǵa da qatysty. Sondyqtan búkil bizdiń áskeri meditsinanyń mekemeleri qoiylatyn talaptar men standarttarǵa sai dep aitýǵa bolady. Áskeri meditsinanyń apparatýralary men tehnikalyq jabdyqtalý jaǵdaiyna toqtalatyn bolsaq, deńgeilerge bólýge bolady. Al eger Nur-Sultan, Almaty qalasynda ornalasqan áskeri gospitaldardyń jabdyqtalý deńgeii oblystyq, respýblikalyq mańyzdaǵy qalalarda ornalasqan aýrýhanalardyń deńgeiine para-par keledi. Al aimaqtarda ornalasqan gospitaldar jaǵdaiyna keletin bolsaq, sál tómendeý dep aitýǵa bolady. Bul rette atap ótetin jaǵdai, bizdiń áskeri meditsinaǵa qoiylatyn talap áskeri qaqtyǵys kezinde meditsinalyq kómek berýge daiyndyq jaǵdaiy. Sondyqtan Qorǵanys ministrligi basshylyǵynyń bizge qoiatyn talaby áskeri meditsinanyń mobildik jaǵyn jetildirý bolyp keledi. Soǵan orai bizdiń qazir mobildik-keshendik tolyqtyrý suraǵy óte jaqsy júrip jatyr dep aita alamyn. Qazirgi kezde bizdiń qoldanysymyzda birneshe mobildik-meditsinalyq keshenderimiz bar. Ol keshendermen jabdyqtaý osy kezde de júrgizilip jatyr, jalǵasyp jatyr. Aǵymdaǵy jyldy aitsaq, biz 60 kereýettik mobildik dalalyq gospital aldyq. Bul gospitaldiń ereksheligi quramynda birneshe operatsiia jasaityn oryndyǵy bar, reanimatsiialyq bólimder bar, naýqastardy ornalastyratyn bólimder bar, diagnostikalyq bólimshesi bar. Diagnostikalyq bólimshesinde zamanaýi tehnikalar men apparattarmen jabdyqtalǵan. Bul diagnostikalyq bólimsheniń quramyna jyljymaly kompiýterlik tomograf kiredi. Bul keshendi sonymen qatar, avtonomdy túrde gazben, sýmen, elektrmen jabdyqtaý múmkinshiligi bar. Onyń artynda tamaqtaný kesheni de qosylǵan. Sondyqtan bul keshendi paidalaný kezinde biz urys-qaqtyǵys kezinde dalalyq jaǵdaida meditsinalyq kómek kórsetýge daiyn ekenimizdi aityp ótýge bolady. Sonymen qatar, biz aǵymdaǵy jyly sanitarlyq-bakterologiialyq laboratoriia aldyq, PTsR jasai alatyn múmkindigi bar onyń. Sonymen qatar brondalǵan transparter aldyq. Sondai-sondai keshendi sharýalar atqarylyp jatyr», – deidi meditsina qyzmetiniń polkovnigi Berik Iliiasov.
Onyń aitýynsha, qazirgi ýaqytta bolashaq áskeri dárigerlerdi Áýe qorǵanys kúshteri áskeri institýtyna kýrsanttardy qabyldaý arqyly júrgizilip jatyr. Áýe qorǵanys kúshteri áskeri institýty Batys Qazaqstan meditsinalyq ýniversitetimen kelisimshart jasalǵan.
«Kýrsanttardy ýniversitet jaǵdaiynda meditsinalyq daiyndyqtan ótkizemiz. Biylǵy jyly biz 26 kýrsant qabyldadyq. Sonymen qatar, biz shetelge kýrsanttar jiberý arqyly da ázirlik júrgizemiz. Biyl biz Sank-Peterbýrg qalasyndaǵy áskeri meditsinalyq akademiiaǵa kýrsanttar jiberdik. Armeniiaǵa, Erevandaǵy meditsinalyq ýniversitetke kýrsanttar jiberdik, olardyń jalpy sany 14 adamdy qurady. Sonymen qatar, biz diplomnan keiingi daiarlyqty da uiymdastyryp jatyrmyz. Ol profildik mamandar daiarlaý úshin qazirgi ýaqytta biz Sank-Peterbýrg qalasyndaǵy áskeri meditsinalyq akademiiaǵa bizdiń ofitserlerdi jiberip jatyrmyz. Biyl shamamen jeti ofitserdi mamandyqtary boiynsha ázirleýge jiberdik. Onyń ústine, Qorǵanys ministrligi basshylyǵynyń qoldaýymen qazirgi ýaqytta biz ózimizdiń elde sol profildik mamandardy daiyndaý is-sharasyn júrgizý úshin daiyndyq jumystaryn júrgizip jatyrmyz. Ol endi rezidentýra boiynsha daiyndyq bolady. Bul rette biz zańnamaǵa ózgerister engizý, uiymdastyrý sharalaryn júrgizip jatyrmyz. Soǵys ýaqytynda meditsinalyq qyzmet kórsetý suraǵyna toqtalatyn bolsaq, árine bizdiń áskeri meditsina tikelei soǵysqa qatysty dep aitý erterek. Bizdiń ondai tájiribemiz joq. Biraq kúndelikti jumysymyzda biz elimizdegi túrli jarylystar kezinde bizdiń áskeri dárigerler kómek kórsetýge qatysyp, qoiylǵan talaptardy abyroimen oryndap shyqqan. Onyń ústine, bizdiń áskeri dárigerler bolyp jatqan kúndelikti jattyǵýlarǵa jiti qatysyp otyrady. Árine, bul júrgizilgen sharalardyń bári bulardyń daiarlyǵyna, erteń el basyna kún týǵan kezde eldi qorǵaýǵa, áskerilerge kómek kórsetý, meditsinalyq kómek kórsetýge daiyndyǵyna senimdimiz», – deidi Berik Iliiasov.
Mamannyń aitýynsha, qazirgi tańda áskeri meditsinalyq mekemelerdiń quzyryna kirmeitin qyzmettiń biri – onkologiia.
«Onkologiia kezinde biz qyzmet kórsetpeimiz. 18-ge tolmaǵan balalarǵa kómek kórsetpeimiz. Bala týý isine aralaspaimyz. Sonymen qatar bizde joǵary tehnologiialyq meditsinalyq qyzmetterdiń ishinde neirohirýrgiia, kardiohirýrgiia, travmatologiia jaqsy, sol rette bizdiń jasap jatqan sharalarymyz bastapqy kezeńde bolyp tur. Halyq densaýlyǵy jáne densaýlyq saqtaý salasy týraly Qazaqstan Respýblikasy kodeksine sáikes, QR azamattary dárigerdi jáne meditsinalyq mekemeni tańdaýǵa quqyly dep jazylǵan. Soǵan bailanysty bizdiń áskeri qyzmetshiler ózderiniń quqyǵyna sáikes azamattyq meditsinalyq mekemelerge júginýge quqylary bar. Áskerilerge barlyq jaǵdai jasalǵan. Olar jergilikti emhanalaryna tirkelgen, onyń ústine Áleýmettik meditsinalyq saqtandyrý qorynda olar úkimet qarajaty esebinen saqtandyrylǵan, sondyqtan bizdiń áskeriler jalpy azamattyq densaýlyq saqtaý júiesinde tolyq em qabyldaýǵa quqyly», – deidi ol.
Sonymen qatar, áskeri qyzmetshilerdi shetelde emdeý tártibi Qazaqstan Respýblikasy Densaýlyq saqtaý ministriniń buiryǵyna sáikes bekitilgen. Eger áskeri qyzmetshiler sol tizimge kiretin naýqastardyń qatarynda bolǵan jaǵdaida shetelde em alýyna bolady.
«Onyń ústine, buiryqqa sáikes, eger áskeri qyzmetshi áskeri qyzmetin ótkerý kezinde jaraqat alǵan jaǵdaida, eger ol jaraqatty Qazaqstanda emdei almaityn bolsaq, ony shetelge jiberýge quqyǵymyz bar. Sanatoriialyq-kýrorttyq emdelý áskeri qyzmetshilerge jáne áskeri zeinetkerlerge ol emdi berý QR Áskeri qyzmet jáne áskeri qyzmettiń mártebesi týraly Zańǵa sáikes bekitilgen. Zańǵa bailanysty áskeri qyzmetshiler jáne 25 jyl ótili bar áskeri zeinetkerler sanatoriialyq-kýrorttyq em alýǵa quqyly. Egerde áskeri qyzmetkerlerge sanatoriialyq-kýrorttyq em qabyldaý úshin meditsinalyq kórsetkishter bizdiń Qorǵanys ministriniń buiryǵymen bekitilse, áskeri zeinetkerlerdiń tizimi Densaýlyq saqtaý ministriniń buiryǵymen bekitilgen. Eger sondai naýqastanýlar bolǵan kezde sanatoriialyq-kýrorttyq em qabyldaýǵa joldanady. Biz biyl sanatoriialyq-kýrorttyq emdelýge 1100 joldama alyp otyrmyz. Ol Saryaǵash qalasynda ornalasqan «Ásel» sanatoriii jáne Qaraǵandy oblysynda ornalasqan Balqash sanatoriii. Josparly túrde qazir emdelýge jiberý jumysy júrgizilip jatyr», – deidi bas áskeri meditsinalyq basqarma bastyǵynyń orynbasary, emdeý profilaktika basqarmasynyń bastyǵy, meditsina qyzmetiniń polkovnigi Berik Iliiasov.
