QR Ulttyq bank tóraǵasynyń orynbasary Aqyljan Baimaǵambetov elimizdiń altyn-valiýta qory týraly aitty, dep habarlaidy "Ult aqparat".
«Aldyn ala málimetter boiynsha, Ulttyq banktiń altyn-valiýta rezervteri 2020 jyldyń qańtarynda 1,2 paiyzǵa, iaǵni 29,3 mlrd AQSh dollaryna deiin artty. Negizinen, ol altynǵa bailanysty operatsiianyń júrgizilýi men onyń qunynyń artýy nátijesinde múmkin boldy. Aldyn ala málimetke qaraǵanda, Ulttyq qordyń aktivteri bir aida 1 paiyzǵa tómendep, 61,1 mlrd dollardy qurady. Buǵan respýblikalyq biýdjetke kepildendirilgen transfertti bólý sebep boldy», - dedi Baimaǵambetov Úkimet otyrysynda.
Onyń sózine qaraǵanda, 1 aqpandaǵy jaǵdai boiynsha jalpy halyqaralyq rezervter 90,4 mlrd AQSh dollaryn qamtydy.
Budan bólek UB ókili Qazaqstan halqynyń depozitteri týraly aityp berdi.
«2019 jylǵy jeltoqsan aiynyń sońynda depozit kólemi 19 trln teńgeni qurady. Ulttyq valiýtadaǵy salymdar 4,1 paiyzǵa, shetel valiýtasynda 3,9 paiyzǵa ósti. Nátijesinde, depozitterdiń dollarlanýy byltyrǵy jeltoqsan aiynda 43,1 paiyzǵa deiin tómendedi», - dedi Baimaǵambetov.
Osy oraida, ol teńgedegi salymdar boiynsha stavkalar óziniń tartymdylyǵyn saqtap turǵanyn atap ótti.
