Qostanai oblysynda karantin rejimi qaita kúsheiedi. Bul týraly óńirlik kommýnikatsilar alańynda ótken brifingte oblys ákimini orynbasary Marat Júndibaev málim etti, dep habarlaidy "Ult aqparat".
Búgin Qostanai oblysynyń ákimi Arhimed Muhambetov koronavirýs juqtyrǵanyn habarlaǵan edik. Osyǵan bailanysty oblys ákiminiń orynbasary Marat Júndibaev turǵyndarǵa úndeý jariialady.
«Oblysymyzda epidemiologiialyq ahýal kúrt quldyrady. Resmi málimetke súiensek, sońǵy 20 kúnniń ishinde 629 adam infektsiia juqtyrǵan. Onyń 369-y simptomdy koronavirýsqa shaldyqqan, al260 adam indettiń klinikalyq belgileri joq túrin juqtyryp, «virýs taratýshylar» sanatyna qosylyp otyr. Aimaqta búginge deiin 192 naýqas dertinen aiyǵyp, 3 adam kóz jumdy. Koronavirýstyń kúrt tarap ketpeýin qamtamasyz etý úshin oblysta 346 oryndyq provizorlyq bólimsheler, sondai-aq 713 karantindik gospitaldar jumys isteýde. Sondai-aq 292 oryndy infektsiialyq bólimder bar. Búginde oblysta 190 jasandy tynys alý qurylǵysy bar. Jýyrda oblys aýrýhanasyna osyndai 5 jańa apparat ákelindi. Maýsym-shilde ailarynda qosymsha 60 shaqty apparat satyp alynady. Onyń 35-i – statsionarlyq, 25-i – jedel meditsinalyq kómek kezinde qoldanýǵa arnalǵan. Infektsiianyń aldyn-alý úshin 27-28 maýsymda Qostanai, Rýdnyi, Jitiqara, Lisakov, Arqalyq, Tobyl qalalarynda lokdaýn rejimi engiziledi», - dedi M.Júndibaev.
Lokdaýn rejimi engizilgen qala turǵyndaryna úiden jumys úshin, em alýǵa,dári-dármek, azyq-túlik, qoqys tógýge, jeke kólikpen saiajaiǵa barýǵa ǵana ruqsat etiledi. Oiyn-saýyq jáne saýda nysandary, bazarlar, saiabaqtar jabylyp, qoǵamdyq kólikter toqtaidy.
Osy kúni óńirde Ulttyq saraptama ortalyǵynyń filialynda 3 zerthana jáne «Olimp» klinikalyq-diagnostikalyq zerthanasy úzdiksiz jumys isteýde.
Bul zerthanalarda táýligine 1600-ge deiin taldaý júrgiziledi.
