Qaraǵandy politseileri transulttyq uiymdasqan qylmystyq topty áshkereledi, dep habarlaidy "Ult aqparat" QR Ishki ister ministrligine silteme jasap.
«Oblystyq politsiianyń jedel-tergeý toby esirtki qylmysyna qarsy is-qimyl departamentiniń kómegimen Qazaqstannyń 5 oblysy aýmaǵynda 5 esirtki zerthanasyn jasaýǵa qatysy bar onnan astam adamdy ustady. Tergeý barysynda zerthanalardy uiymdastyrýshylardyń bizdiń elden tys jerde bolǵany jáne Qazaqstan, Resei, TMD-nyń basqa da elderi men alys shetelderde psihotroptyq zattardy daiyndap satatyn transulttyq uiymdasqan top qurǵany anyqtaldy», - dedi QR IIM resmi ókili Nurdildá Oraz onlain brifingide.
Qazaqstanda jumys isteitin bólimshege basshylyq etý men úilestirý «Telegramm» jáne «Signal» messendjerlerimen júzege asyrylǵan.
«Transulttyq uiymdasqan qylmystyq top kýratorlary psihotroptyq zattardy shetelden bizdiń elge suiyq túrde jetkizý arnasyn uiymdastyrǵan, ol avtokólik mailary men qosalqy bólshekter, alkogoldi ishimdikter, turmystyq zattar, mai radiatorlary men órt sóndirgishter túrinde logistikalyq firmalar arqyly jetkizilip turǵan», - dedi resmi ókil.
Transulttyq uiymdasqan top qatysýshylarynan jalpy sany 70 kilogramnan astam qurǵaq jáne suiyq túrinde alynǵan daiyn sintetikalyq esirtki jáne 3,5 tonnadan astam prekýrsorlar tárkilengen.
