Qazaqstannan urlanǵan 1,3 million dollar Shveitsariia bankinen tabyldy, - dep habarlaidy "Ult aqparat" QR Bas prokýratýrasynyń baspasóz qyzmetine silteme jasap.
"Qazaqstan Respýblikasy Bas prokýratýrasy qylmystyq jolmen alynǵan jáne elden tysqary jerge zańsyz shyǵarylǵan múlikti qaitarý boiynsha jumys nátijesinde RothschildBankZurich shveitsarlyq bankinen 1,3 millionnan astam AQSh dollary kólemindegi "tyiym salynǵan" aqshalai qarajatty anyqtady", - delingen vedomstvo habarlamasynda.
Sóitse, qarjy M. Abdralievke tiesili eken, ol 2012 jyldan bastap halyqaralyq izdestirilýde. M. Abdralievke "Qorǵas isi" boiynsha qylmystyq qaýymdastyqtyń músheleri T. Jaqaevqa, I. Ábdirahmanovqa jáne B. Qurmanalievke shet elde aqshalai qarajatty zańdastyrýǵa kómektesti degen kúdik kelgen.
Osyǵan bailanysty, prokýror shveitsarlyq banktegi aqshalai qarajatty tárkileý týraly ótinishhatty sotqa joldap, biylǵy 29 naýryzda Almaty qalasynyń Almaly aýdandyq soty prokýrordyń ótinishhatyn qanaǵattandyrdy.
Odan basqa, bul qylmystyq is boiynsha sotqa deiingi tergep-tekserý barysynda "TAT Kredit" JShS-nyń keńsesin tintý kezinde M. Abdralievke tiesili 762 myń AQSh dollary jáne 915 myń teńge alynǵany aitylady.
Osydan keiin prokýratýra aqshalai qarajatty tárkileý úshin sotqa tiisti ótinishhat joldaǵan. Nátijesinde prokýratýra organdarynyń bastamasy boiynsha 2,1 millionnan asa AQSh dollary memlekettiń paidasyna tárkilengen.
Aita keteiik, qylmystyq-protsestik zańnamaǵa ózgeristerdiń engizilýine bailanysty biyldan bastap úkim shyqqanǵa deiin zańsyz jolmen alynǵan múlik tárkileýge jatady.
