Foto: QR SIM baspasóz qyzmeti
Qazaqstan halqynyń atynan Aýǵanstannyń batysyndaǵy zilzaladan zardap shekken halyqqa gýmanitarlyq kómektiń alǵashqy legin ákelgen arnaiy ushaq Gerat áýejaiyna qondy, dep habarlaidy Kazinform agenttigi.
Gýmanitarlyq júkti Aýǵanstan azamattyq áýejailar departamentiniń bas direktory - zilzala saldarymen kúres shtabynyń múshesi Gavral Abdýl Sattar bastaǵan top qabyldap aldy. Shtab múshesi Qazaqstan Iran men Túrkiiadan keiin úshinshi bolyp kómek jetkizgenin aitady.
«Birinshiden, osynaý qiyn kúnde kómek qolyn soǵan dos peiildi Qazaqstannyń halqyna, Prezident Qasym-Jomart Toqaev myrzaǵa alǵys aitamyz. Júkti qabyldap alǵannan keiin arnaiy komissiia ony qaida jóneltetinin keńesip sheshedi. Qazir qaitys bolǵan adamdardy jerlep, zardap shekkenderge alǵashqy kómek kórsetip úlgerdik. Taǵy zardap shekkender anyqtalsa, oǵan da daiyn otyrmyz. Óitkeni, búgin saǵat 5.00 kezinde qazaqstandyq qutqarýshylar jumys istep jatqan aýmaqta taǵy jer silkindi. Taǵy da Qazaqstan halqyna osyndai qiyn kezde kómek jiberip jatqany úshin rahmet aitamyz», - deidi shtab ókili.
Buǵan deiin habarlaǵanymyzdai, Ulttyq ulannyń Y8F200W ushaǵyna Astana, Almaty, Shymkent qalalarynan 1200 adam panalaityn 70 shatyr, jalpy salmaǵy 6 tonnadan asatyn dári-dármek tieldi. Bul dári-dármektiń tizimi Aýǵanstan tarapy suratqan tizbe boiynsha jasaqtalǵan. Atap aitqanda, azitromitsin, ibýprofen, tseftazidim, paratsetamol siiaqty ystyq túsiretin, qabynýǵa qarsy preparattar men antibiotikter jetkizildi.
Zilzala saldarymen kúres shtabynyń ókili Garval Abdýl Sattar Gerat provintsiiasyndaǵy zilzala kezinde qirandyǵa ainalǵan 13 eldi mekenniń turǵyndaryna áli de shatyrlar men meditsinalyq buiymdar, dári-dármek óte qajet ekenin aitady.
Eske salsaq, 7 qazanda Aýǵanstannyń batysynda ornalasqan Gerat provintsiiasyndaǵy 6,3 baldyq jer silkinisinen 2053 adam qaza taýyp, 9 myńnan astam adam jaraqat alǵan.
Buǵan deiin Qazaqstannyń Aýǵanstanǵa gýmanitarlyq kómek kórsetetini habarlanǵan edi.
Sonymen qatar Aýǵanstanǵa úiindi astynda qalǵan adamdardy qutqarý úshin TJM qutqarýshylary, sonyń ishinde kinolog mamandar jiberildi.
Syrtqy ister ministrliginiń resmi ókili Aibek Smadiiarovtyń aitýynsha, Aýǵanstandaǵy jer silkinisinen Qazaqstan azamattary zardap shekken joq.
