Qazaqstannan shetelge aqsha aýdarymdarynyń kólemi kúrt ósti. Mundai málimetti QR Qarjy ministrligi Memlekettik kirister komitetiniń tóraǵasy Marat Sultanǵaziev OKQ-da ótken jatqan baspasóz máslihatynda bólisti, dep habarlaidy QazAqparat.
Jalpy, 2020 jyly 11,5 myńǵa jýyq salyqtyq tekserý júrgizilgen. Bul kórsetkish aldyńǵy jylmen salystyrǵanda 58% nemese 16 myńǵa az. Dese de óndirip alý somasy 78 mlrd teńgeni quraǵan. 2020 jyly 2,9 myń kedendik tekserý júrgizilip, onyń nátijesinde 30,6 mlrd teńge kóleminde qosymsha kedendik túsimder men salyqtar qosymsha eseptelip, 11,3 mlrd teńge óndirilgen.
«Jalpy, biz tekserýlerge dálirek shyǵa bastadyq. Ony jariialanǵan statistika boiynsha baǵalaýǵa bolady. Qashyqtan basqarýdyń tiimdiligi 18% artyp, qosymsha 325 mlrd teńge usynyldy. Qashyqtan basqarýdyń jańa ádisteri ázirlendi. Táýekeldi kompaniialardy erte kezeńde anyqtaý jáne EShF (elektrondy shot-faktýra) berý qyzmetterin shekteý úshin pilottyq joba júzege asyrylýda», - dedi Marat Sultanǵaziev.
Ol pilottyq joba bastalǵannan beri 5 myń táýekeldi salyq tóleýshige EShF berý múmkindigi shektelgenin, onyń ainalymy 2 trln teńge, joba iske qosylǵannan beri barlyǵy 60 mlrd teńge bolǵanyn atap ótti.
«2016 jyldan bastap alǵash ret Qazaqstanda qolma-qol aqsha alý 38% qysqardy. Alaida osy jyldyń 11 aiynda elden tys jerlerge aqsha aýdarymdarynyń kólemi kúrt ósti. Bul baǵyttaǵy ósim 19% qurap otyr. Biz osy qarajattardyń aýdarylýynyń oryndylyǵyn naqtylaýdy osy jyldyń basym mindeti retinde qoidyq», - deidi Marat Sultanǵaziev.
