Qazaqstannan Qytaiǵa ushaq, avtobýs pen poiyz qatynasy qai ýaqytqa deiin toqtatyldy? Bul suraqqa QR IIDM Kólik komitetiniń tóraǵasy Samat Ǵylymov jaýap berdi, dep habarlaidy QazAqparat.
Aita ketsek, buǵan deiin QR Úkimeti janyndaǵy vedomstvoaralyq komissiia Qazaqstan aýmaǵynda koronavirýstyń taralýyna jol bermeý boiynsha birqatar qosymsha qorǵaný sharalaryn qabyldaǵan bolatyn. Osy sharalarǵa sáikes, Qazaqstan men Qytai arasyndaǵy ushaq, avtobýs pen poiyz qatynasy ýaqytsha toqtatylady. Al «ýaqytsha» degen sóz qandai merzimdi bildiredi? Tilshilerdiń bul suraǵyna Samat Ǵylymov jaýap berdi.
«Jalpy, boljaýymsha jaǵdai túzelgenge deiin osy shekteý kúshinde bolady. BAQ-tan habarlaǵandai, Qytai tarapy koronavirýstyń shyrqaý shegi aldaǵy bir aptada ótetinin jazyp jatyr. Sol sebepti, bul suraqqa jaǵdai turaqtalǵansha dep jaýap berer edim», - dedi Samat Ǵylymov.
Al eki el arasyndaǵy logistikalyq qarym-qatynasqa qoiylǵan shekteý ekonomikaǵa qanshalyqty shyǵyn keltirýi múmkin? Bul suraqqa jaýap bergen Samat Ǵylymov ázirge bul suraqqa jaýap berý múmkin emes ekenin aitady.
«Júk tasymaly boiynsha eki el arasynda eshqandai shekteý qoiylǵan joq. Al jalpy ol shyǵynnyń esebi jaǵdai turaqtalǵannan keiin biraq belgili bolady», - dedi ol.
