2019 jyldyń 1 sáýirinde Qazaqstan halqynyń sany 18 mln 448,6 myń adamǵa jetip, ótken jyldyń 1 sáýirine qaraǵanda 238,8 myń adamǵa nemese 1,3 paiyzǵa artty, dep habarlaidy "Ult aqparat".
QR UEM Statistika komitetiniń dereginshe, qala turǵyndarynyń sany 10 mln 734,2 myń adamdy nemese jalpy halyq sanynyń 58,2 paiyzyn, al aýyl turǵyndary 7 mln 714,47 myń adamdy nemese 41,8 paiyzdy quraidy.
Qańtar-naýryzda respýblikada 1 jasqa tolmaǵan 856 sábidiń shetineýi tirkelgen. 2018 jyldyń dál osyndai kezeńimen salystyrǵanda 1 jasqa deiingi sábilerdiń ólim-jitimi 4,4 paiyzǵa artyp otyr. 2019 jyldyń qańtar-naýryzynda sábi óliminiń koeffitsienti 1000 dúniege kelgen balaǵa shaqqanda 9,31 oqiǵa boldy.
Sábi ólim-jitiminiń negizgi sebebi perinataldyq kezeńde paida bolǵan jaǵdai sanalady. Onyń saldarynan qańtarda 447 bala shetinedi. Týa bitken aýytqýdan 164, tynys alý músheleri aýrýynan 72, tótenshe jaǵdailardan 24 bala kóz jumdy.
Osy jyldyń qańtar-naýryzynda ótken jyldyń osy kezeńimen salystyrǵanda, Qazaqstanǵa kelýshilerdiń sany 8,4 paiyzǵa azaiyp, ketýshilerdiń sany 22 paiyzǵa artty. Negizgi migratsiialyq almasýlar TMD elderine tiesili. TMD elderinen kelgenderdiń úlesi 84,5 paiyzdy jáne atalǵan memleketterge ketkender sany 89,1 paiyz boldy.
El aýmaǵynan tysqary ketken migranttar sany 14,1 paiyzǵa artty. Óńiraralyq qonys aýdarýda kóshi-qonnyń oń saldosy Mańǵystaý oblysynda (369 adam) jáne Nur-sultan (6 089) men Almaty (6 559) qalalarynda tirkelgen.
