Qazaqstanǵa jahandyq janjaldar sheshiminiń jaýabyn tabýǵa týra keledi. Mundai pikirdi búgin Niý-Iorktan tikelei bailanysqa shyǵyp, qazaqstandyq BAQ ókilderimen suhbattasqan BUU Bas hatshysynyń kómekshisi Miroslav Encha bildirdi, dep habarlaidy QazAqparat.
«Osy aida Qazaqstan BUU Qaýipsizdik keńesine tóraǵalyq etedi. Bul airyqsha mańyzdy ról. Óitkeni Qazaqstan Qaýipsizdik keńesiniń tóraǵasy retinde onyń otyrysyn shaqyryp, kún tártibin uiymdastyrady jáne Qaýipsizdik keńesi atynan sóz sóileidi. Kelesi aptada Qaýipsizdik keńesiniń birneshe óte mańyzdy otyrysy bolady. Birinshisi - Prezident Nursultan Nazarbaevtyń qatysýymen iadrolyq qarýsyzdaný, senim sharalary máselelerine arnalǵan otyrys. 19 qańtar, juma kúni Ortalyq Aziia men Aýǵanstan máselelerine arnalǵan otyrys ótedi», - dedi Miroslav Encha.
Sonymen qatar ol Siriia qaqtyǵysyn sheshý máselesinde Qazaqstan airyqsha ról oinaityndyǵyn, elordada Astana protsesiniń 8 raýndy ótkenin aitty.
«Bul protsesstiń Siriiadaǵy qaqtyǵys problemalary sheshimin izdeýdegi úlesi óte úlken. Bul shielenisti tómendetý, deeskalatsiia aimaǵyn qurý jáne eń mańyzdysy atalǵan protsess BUU Bas hatshysynyń arnaýly ókili Steffan de Mistýranyń jetekshiligimen Jenevada ótetin saiasi protsesske qoldaý kórsetedi», - dedi BUU Bas hatshysynyń kómekshisi.
Miroslav Enchanyń paiymynsha, Qazaqstan Ortalyq Aziiadaǵy beibitshilik pen turaqtylyqty nyǵaitýǵa qosqan mańyzdy úlesin tiimdi paidalanýda.
«Bul - iadrolyq qarýsyzdaný máseleleri, Semei iadrolyq poligonyn jabý, Ortalyq Aziiadaǵy iadrolyq qarýsyz aimaq qurý. Qazaqstannyń bastamasymen Halyqaralyq iadrolyq synaqtarǵa qarsy is-qimyl kúniniń negizi qalandy. Bul baǵytta Qazaqstan qyzmetin jalǵastyrýda», - dedi ol.
Onyń aitýynsha, Aýǵanstanmen bailanysty qaýipsizdik máselelerin sheshýde de Qazaqstan airyqsha rólge ie.
«Aýǵanstan problemasyn tek qana áskeri jolmen sheshý múmkin emestigi barlyǵyna da túsinikti. Qaita óńirlik yntymaqtastyqty, infraqurylymdyq jobalardy qoldaý qajet. BUU-nyń shtab-páteri Qazaqstannyń Aýǵanstanǵa qoldaý kórsetip otyrǵanyn, onyń ishinde kadrlar daiyndaýǵa járdem berip jatqanyn jaqsy biledi. Kezinde Ortalyq Aziiadaǵy preventivti diplomatiia óńirlik ortalyǵynyń basshysy bolyp jumys istegen kezimde Almatydaǵy aýǵan jastary bilim alyp jatqan ýniversitetterde dáris oqyǵan edim. Menińshe, bul Aýǵanstannyń beibit bolashaǵyn qoldaýǵa jáne Ortalyq Aziiadaǵy yntymaqtastyqty damytýǵa qosylǵan naqty úles. Osylaisha, Qazaqstan jahandyq beibitshilikti qamtamasyz etýge úles qosyp otyr», - dedi Encha.
