Qazaqstanǵa taǵy 250 myń tonna qant ákelýge múmkindik bar, dep habarlaidy QazAqparat.
Bul týraly QR Aýyl sharýashylyǵy ministri Erbol Qarashókeev Úkimet otyrysynda málim etti.
Jiyn barysynda Úkimet basshysy Álihan Smaiylov elde qantqa suranystyń artyp ketýine bailanysty qandai sharalar qabyldanyp jatqanyn surady.
«Aýyl sharýashylyǵy ministrligi Saýda jáne integratsiia ministrligimen birge apta saiyn ishki naryqtyń azyq-túlik taýarlarymen qamtamasyz etilýin taldaýdy júrgizip otyrmyz. Ahýaldy turaqty baqylaýda ustap otyrmyz. Búgingi tańda shamamen 1,3 mln tonna áleýmettik mańyzy bar azyq-túlik qory jinaldy. Ol qor kún saiyn tolyqtyrylyp otyr. Atap aitsaq, 144 myń tonna un, 40 myń tonnadai kúrish jinalǵan. 21,5 myń tonna makaron ónimderi jáne shamamen 900 myń tonnadai kókónis ónimderi qoimada jinalyp tur. Azyq-túlik qorlary kún saiyn jańartylýda, ony daiarlaýǵa qajet shikizat ta jetkilikti. Sol sebepti ahýal turaqty. Ózimizge, elge jetetindei áleýmettik mańyzy bar azyq-túliktiń kólemi jetkilikti», - degen ministr qoimalardaǵy qant kólemi týraly naqty aqparat berdi.
«Qazirgi tańda bizde 90 myń tonnadai qant bar. Onyń ishinde turaqtandyrý qorlarynda, saýda obektilerinde, qoimalarda 38,2 myń tonna qant bar. Zaýyttardaǵy shiki qantty esepke alatyn bolsaq, 20 myń tonna daiyn qant, 20 myń tonnadai shiki qant bar. Azyq-túlik kelisimshart korporatsiiasynda 2,5 myń tonna qant bar. Osy qantty óńirlerge bólý jumystary júrip jatyr. Odan basqa Qazaqstan Respýblikasynyń 31 tamyzǵa deiin 250 myń tonna kóleminde aq qant pen shiki qantty bajsyz ákelýge quqyǵy bar. Ol kvotalar qazir bólinip jatyr. Syrtqy naryqtaǵy saýda qyzmetine qatysýshylar osy qantty ákelý jumystaryn bastap ketti. Jaqyn arada ákele bastaidy», - dedi Erbol Qarashókeev.
