QR Premer-Ministri Asqar Mamin Máskeý qalasyna jumys sapary aiasynda RF Úkimetiniń Tóraǵasy Mihail Mishýstinmen, sondai-aq Reseidiń ortalyq memlekettik organdarynyń, memlekettik korporatsiialary men qarjy-bank qurylymdarynyń basshylyǵymen kelissóz ótkizdi, dep habarlaidy primeminister.kz.
Úkimet basshylary saýda-ekonomikalyq, qarjy-investitsiialyq, energetika jáne ǵarysh salalaryndaǵy Qazaqstan-Resei yntymaqtastyǵyn odan ári arttyrý máselelerin, sondai-aq ónerkásiptik kooperatsiia sheńberindegi jobalardy talqylady.
Eýraziialyq ekonomikalyq odaq formatyndaǵy ózara is-qimyldyń ózekti máseleleri qaraldy.
COVID-19-dyń taralýyna qarsy kúres jáne eki eldiń ekonomikalary úshin pandemiianyń saldaryn joiý jónindegi birlesken is-sharalarǵa erekshe nazar aýdaryldy.
«Spýtnik V» reseilik vaktsinasynyń 4 mln dozasyn Qazaqstanǵa qosymsha jetkizý týraly ýaǵdalastyqqa qol jetkizildi.
«Virýstyń taralýyn jeńý úshin bizdiń elderimizdiń kúsh-jigerin, onyń ishinde halyqty jappai vaktsinatsiialaý máselelerinde úilestirýdiń joǵary deńgeii qajet», — dedi A. Mamin.
Sonymen qatar biylǵy jyldyń ekinshi jartysynda Kókshetaý qalasynda ótetin «Ekologiia jáne jasyl ósim salasyndaǵy yntymaqtastyq» taqyrybyna arnalǵan XVII Aimaqaralyq yntymaqtastyq forýmyna daiyndyq máselesi qaraldy.
QR men RF arasyndaǵy 2021-2025 jyldarǵa arnalǵan Ekonomikalyq yntymaqtastyqtyń keshendi baǵdarlamasyn ázirleý jáne oǵan qol qoiý boiynsha jumysty jandandyrý qajettigi atap ótildi.
Resei – Qazaqstannyń negizgi syrtqy ekonomikalyq seriktesi. 2020 jyly taýar ainalymy $18,2 mlrd qurady.
Qazaqstanda Resei kapitalynyń qatysýymen 10 myńnan astam kásiporyn jumys isteidi, bul sheteldik qatysýy bar kásiporyndardyń jalpy sanynyń 36,1%-yn quraidy.
RF ónerkásip jáne saýda ministri Denis Mantýrovpen jáne Reseidiń tikelei investitsiialar qorynyń bas direktory Kirill Dmitrievpen kezdesýde óńdeý ónerkásibindegi (farmatsevtika, mashina jasaý, metall óńdeý, himiia ónerkásibi jáne t.b.) birlesken jobalardy iske asyrýdyń jai-kúii men perspektivalary, sondai-aq ekijaqty formatta jáne EAEO sheńberinde saýdany keńeitý talqylandy.
«Rosgeologiia» basqarma tóraǵasy Sergei Gorkiimen eki eldiń geologiia salasyndaǵy ózara is-qimylynyń ózekti máseleleri talqylandy. «Roskosmos» memlekettik korporatsiiasynyń bas direktory Dmitrii Rogozinmen kezdesýde ǵarysh salasyndaǵy yntymaqtastyq jobalary qaraldy.
Saparǵa QR Premer-Ministriniń orynbasary Roman Skliar, Strategiialyq josparlaý jáne reformalar agenttiginiń tóraǵasy — AHQO basqarýshysy Qairat Kelimbetov, indýstriia jáne infraqurylymdyq damý ministri Beibit Atamqulov, densaýlyq saqtaý ministri Aleksei Tsoi, QR-nyń RF-daǵy Tótenshe jáne Ókiletti Elshisi Ermek Kósherbaev jáne basqalar qatysty.
