Sybailas jemqorlyqqa qarsy is-qimyl agenttiginiń usynysymen Qazaqstanǵa shetelden jetkizilgen gýmanitarlyq kómektiń qaida bólinetini týraly aqparat «SQ-Farmatsiia» JShS saitynda jariialanǵan, dep habarlaidy QazAqparat.
«Kelip túsetin meditsinalyq preparattar men buiymdardy jymqyrý jáne qaita satýǵa jol bermeý maqsatynda Sovid-19-ǵa qarsy kúreske baǵyttalǵan sheteldik gýmanitarlyq kómekti bólý protsesi jurtshylyqty tarta otyryp baqylaýǵa alyndy. Gýmanitarlyq kómekti súiemeldeý barysynda agenttik qyzmetkerleri densaýlyq saqtaý basqarmalary men meditsinalyq mekemelerdiń qyzmetkerlerimen profilaktikalyq túsindirý jumystaryn júrgizýde. Qaptamalarda «Gýmanitarlyq kómek – tegin» móri qoiyldy. Bul jumys taýardy odan ári maqsatsyz paidalaný táýekelin tómendetedi», - dedi QR Sybailas jemqorlyqqa qarsy is-qimyl agenttiginiń parasat departamentiniń direktory Ǵanijan Asanuly onlain baspasóz máslihaty barysynda.
Onyń aitýynsha, qazirgi ýaqytta Katar, QHR, BAÁ-dan kelgen gýmanitarlyq kómek súiemeldengen. Resei, Ózbekstan, DDU, Túrkiia jáne Germaniiadan kelgen gýmanitarlyq kómek tasymaldaý kezeńinde tur.
Al Chehiiadan Almaty qalasyna kelgen gýmanitarlyq kómek bólý satysynda.
«Agenttik pen «SQ-Farmatsiia» JShS pandemiiaǵa qarsy kúres kezeńinde kelgen gýmanitarlyq kómekti árbir óńirge deiin bólý mańyzdylyǵyn eskerdi. Osylaisha, agenttik tizbeler men kólemderdi qosa alǵanda barlyq aqparat týraly ashyq túrde ornalastyrýdy usyndy. Bul aqparat «SQ-Farmatsiia» JShS saitynda ornalastyrylǵan», - deidi ol.
