Qazaqstanǵa kelgen sheteldikterdiń teń jartysy ýaqytsha tirkeýge turmaidy. Bul týraly búgin Májilistegi Úkimet saǵatynda depýtat Nurlan Ábdirov aitty, dep habarlaidy QazAqparat.
«2015 jyldan bastap elimizge keletin sheteldikterdiń sany jyl saiyn 20 paiyzǵa artyp otyr. Tek ótken jyly ǵana bizge 5,5 mln sheteldik, negizinen TMD elderiniń azamattary keldi. Bul rette ishki ister organdarynda ne bári 2,5 mln adam ǵana tirkelgen, iaǵni jartysynan da az», - dedi depýtat.
Onyń aitýynsha, migranttar tarapynan oryn alatyn quqyq buzýshylyq deńgeiin eskerer bolsaq, bul ózekti másele. Óitkeni, Ishki ister ministrliginiń derekterine sáikes, sońǵy 3 jylda 330 myń sheteldik ákimshilik jaýapkershilikke tartylyp, kóshi-qon zańyn buzǵany úshin 36 myńnan astam adam el aýmaǵynan shyǵarylǵan.
«Sheteldikterge qatysty 3 506 qylmystyq is qozǵalǵan. Buǵan qosa, qylmystardyń basym bóligi urlyq jáne esirtki qylmysyna qatysty. 2,5 myńnan astam sheteldiktiń ózi qylmystyń qurbanyna ainaldy. Kóshi-qon qyzmeti tarapynan baqylaýdyń jetkiliksizdigi problemasy anyq kórinip tur», - dedi Nurlan Ábdirov.
Depýtattyń sózine qaraǵanda, zańsyz kóshi-qonǵa qarsy turýdaǵy memlekettik organdar qyzmetiniń tiimdiligin arttyrý kerek.
«Ózge de mańyzdy sharalardyń qatarynda Ishki ister ministrligi Ulttyq qaýipsizdik komitetiniń Shekara qyzmetimen birge ótkizý beketterinde biometriialyq baqylaý júiesin engizýi, tulǵany teńdestirýge múmkindik beretin tólqujat-viza jáne ózge de qujattardyń qorǵalýyn arttyrý esebinen zańsyz kóshi-qon arnalarynyń uiymdastyrylýyna qarsy turýy, eldiń halyqaralyq mindettemelerin eskere otyryp, zańsyz migranttardy deportatsiialaýdyń tiimdi tetikterin ázirleýi qajet», - dedi ol.
Aita keteiik, Nurlan Ábdirov 2017 jyly Qazaqstanda qosarlanǵan azamattyǵy bar shamamen 600 adam jazaǵa tartylǵanyn aitqan bolatyn.
