Jaqynda Qazaqstannyń soltústik óńirine qatysty Nikonovtyń (Dýma depýtaty - red.) daýly málimdemesine belsendi aralasyp, «Resei ózine tiesili birneshe aimaqty Qazaqstanǵa syiǵa bergen» degen pikirdi odan ary ýshyqtyrǵan RF memlekettik dýmasynyń depýtaty Evgenii Fedorovtyń Nur-Sultan men Almaty qalalarynda keńsesi bar eken. Bul týraly belgili saiasatker, Ulttyq qoǵamdyq senim keńesiniń eks-múshesi Muhtar Taijan Facebook jelisinde jazdy, dep habarlaidy Azattyq ruhy saity.
«Kárim Qajymhanuly Másimov (UQK), Erlan Zamanbekuly Turǵymbaev (IIM), Ǵizat Dáýrenbekuly Nurdáýletov (Bas prokýratýra), biz siiaqty qarapaiym azamattarǵa túsindirińizder, kúni búginge deiin Qazaqstanda Ulttyq azat etý qozǵalysy uiymy qandai sebepterge bailanysty jumys istep tur? Olardyń ashyq túrdegi negizgi maqsaty – Qazaqstannyń táýelsizdigin jáne territoriialyq tutastyǵyn joiý», - dep jazdy ol.
Qoǵam belsendisi atalǵan uiymnyń keńseleri ornalasqan mekenjaidy da atady.
«Bul uiymnyń Almaty men Nur-Sultan qalalarynda keńseleri bar. Olar ashyq túrde uiymǵa adamdar jinaidy. Nur-Sultandaǵy meken-jaiy (Syǵanaq k-si, 19. Al Syǵanaq 20 meken-jaiy) – Ulttyq qaýipsizdik komitetiniń ǵimaratynda. Kárim Qajymhanuly, sizderge kórshi ornalasqan. Mundaiǵa qalai jol berýge bolady? Al Ulttyq azat etý qozǵalysy uiymynyń basshysy – reseilik depýtat Fedorov!» - dep jazǵan Muhtar Taijan.
Eske sala keteiik, jaqynda RF memlekettik dýmasynyń bilim jáne ǵylym jónindegi komitetiniń tóraǵasy Viacheslav Nikonov telearnalardyń birinde «Qazaqstannyń soltústigi – Reseidiń tartýy» dep daýly málimdeme jasady. Osyǵan bailanysty QR Syrtqy ister ministrligine Resei Federatsiiasynyń ýaqytsha senimdi ókili Aleksandr Komarov shaqyrylyp, reseilik diplomatqa QR SIM ustanymy kórsetilgen nota tabystaldy.
Nikonovtyń daýly málimdemesinen keiin QR Senatynyń depýtaty Muhtar Qul-Muhamed jaýap berip, «Bul – milliondaǵan qazaq pen orystyń tarihi tanymyn qorlaý» degen baǵa berdi.
Túrkiia jastary da reseilik depýtattyń daýly málimdesine qatysty aktsiia bastap, «Resei, Qazaqstannan qolyńdy tart!», «Qazaqstan jalǵyz emes!», «Kim Qazaqstanǵa qarsy bolsa, Túrkiiaǵa da qarsy!» degen uranmen qoldaý kórsetýdi bastady. Bul týraly qazaq tilin qorǵaýǵa belsendi atsalysyp júrgen Oǵyz Doǵan YouTube jelisinde jariialady.
